اسلام آباد( پاکستان پوائنٹ نیوز07۔جولائی۔2018ء ) شریف خاندان دے وکیلاں نے ایون فیلڈ ریفرنس دے فیصلے خلاف نواز شریف، مریم نواز تے کیپٹن (ر) صفدر دیاں اپیلاں تیار کر لیاں، نواز شریف ، مریم نواز تے کیپٹن (ر) صفدر نے وکالت نامیاں اُتے دستخط وی کر دتے، اپیلاں پرسوں اسلام آباد ہائی کورٹ وچ دائر کیتیاں جان گیاں۔ نجی ٹی وی مطابق ایون فیلڈ ریفرنس دے فیصلے خلاف نواز شریف دے وکیل خواجا حارث نے اپیل تیار کیتی اے ۔
اپیل دا مڈھلا مسودہ وی تیار کر لیا گیا اے۔ وکیل اجے عدالتی فیصلے دا ہور جائزہ لے رہے نیں تاں جے اپیلاں وچ کُجھ شیواں ہور شامل کیتیاں جاسکن۔ اپیلاں دائر کرن دے حوالے نال وکیلاں نے اپنے مُکلاں نال وی صلاح کیتی اے جدکہ نواز شریف ، مریم نواز تے کیپٹن (ر) صفدر نے وکالت نامیاں اُتے دستخط وی کر دتے نیں۔ وکیلاں نے نواز شریف تے مریم نواز نوں صلاح دتی اے کہ جے اوہ دس دناں وچ پاکستان نہ آئے تے اپیلاں وچ ریلیف ملنا مشکل اے۔
چیتے رہوے کہ پچھلے دیہاڑے احتساب عدالت ولوں ایون فیلڈ ریفرنس کیس دا فیصلا سُنا دتا گیا اے۔ فیصلے دے تحت سابق وزیر اعظم نواز شریف نوں 10، اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف نوں 10ملین پاؤنڈ تے مریم نواز نوں 2ملین پاؤنڈ جرمانہ وی کیتا گیا اے۔
