اسلام آباد( پاکستان پوائنٹ نیوز07۔جولائی۔2018ء ) ایون فیلڈ ریفرنس کیس وچ سابق وزیر اعظم نواز شریف، مریم نواز تے کیپٹن (ر) صفدر نوں پچھلے دیہاڑے احتساب عدالت نے سزا سُنائی۔ (ن) لیگی قیادت نے اپنے انتخابی امیدواراں نوں ایس سزا خلاف احتجاج ریکارڈ کروان دی ہدایت کیتی اے۔ میڈیا رپورٹ مطابق مسلم لیگ (ن) دی قیادت نے انتخابی امیدواراں نوں ہدایت کیتی کہ اوہ اپنی انتخابی مہم بانہواں اُتے کالیاں پٹیاں بنھ کے چلان۔
پارٹی قیادت ولوں سنیہا ملن مگروں (ن) لیگی امیدواراں تے وکراں سنے کئی انتخابی امیدواراں نے بانہواں اُتے کالیاں پٹیاں بنھ کے فیصلے خلاف احتجاج شروع کر دتا اے۔ ایس توں وکھ پچھلے دیہاڑے احتساب عدالت دے فیصلے مگروں مسلم لیگ (ن) دے صدر شہباز شریف نے سینئر (ن) لیگی قیادت نال پریس کانفرنس کیتی ۔ پریس کانفرنس دوران اوہناں نے فیصلے نوں زیادتی قرار دیندے ہوئے رد کر دتا سی۔
پر ایس موقعے اُتے سینئر رہنماواں نے احتجاجن بانہواں اُتے کالیاں پٹیاں بنھ ہوئیاں سن۔ کالیاں پٹیاں بنھن والے رہنماواں وچ حمزہ شہباز، سابق وزیر ریلوے خواجا سعد رفیق ، مشاہد حسین سید تے ہور شامل سن۔ پر مسلم لیگ (ن) دے صدر شہباز شریف نے اپنی بانہ اُتے پٹی نہیں بنھی سی۔چیتے رہوے کہ پچھلے دیہاڑے احتساب عدالت ولوں ایون فیلڈ ریفرنس کیس دا فیصلا سُنا دتا گیا اے۔ فیصلے دے تحت سابق وزیر اعظم نواز شریف نوں 10، اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف اُتے 10ملین پاؤنڈ تے مریم نواز اُتے 2ملین پاؤنڈ جرمانہ وی کیتا گیا اے۔
