کیہ شیر فیر آ رہیا اے؟

جے الیکشن 50فیصد وی صاف و شفاف ہوگیا تے آؤندے الیکشن وچ مسلم لیگ (ن) دے ووٹر شیر نوں ووٹ دین گے تے الیکشن وچ فیر ساڈی آس توں ودھ ووٹ شیر لے لئے گا:حامد میر

کیہ شیر فیر آ رہیا اے؟
 جے الیکشن 50فیصد وی صاف و شفاف ہوگیا تے آؤندے الیکشن وچ مسلم لیگ (ن) دے ووٹر شیر نوں ووٹ دین گے تے الیکشن وچ فیر ساڈی آس توں ودھ ووٹ شیر لے لئے گا:حامد میر

اسلام آباد( پاکستان پوائنٹ نیوز07۔جولائی۔2018ء ) نجی ٹی وی چینل دے پروگرام وچ گل بات کردے ہوئے مشہور پرچا کار وتجزیہ کار حامد میر نے آکھیا کہ جے الیکشن 50فیصد وی صاف و شفاف ہو گیا تے مسلم لیگ (ن) دے انتخابی امیدوار بھاویں ٹُٹ گئے نیں پر میں لوکاں وچ پِھر کے آیا واں، میں پشاور تیکر گیا واں تے لوکاں نال گل بات کیتی ، میں تہانواں دس دیواں کہ مسلم لیگ (ن) دے انتخابی امیدوار بھاویں کمزور نیں پر جو مسلم لیگ (ن) دا ووٹر اے اوہ ہن وی نواز شریف نال کھلوتا اے تے تُسیں ویکھو گے جے الیکشن 50فیصد وی صاف و شفاف ہوگیا تے آؤندے الیکشن وچ مسلم لیگ (ن) دے ووٹر شیر نوں ووٹ دین گے تے الیکشن وچ فیر ساڈی آس توں ودھ ووٹ شیر لے لئے گا۔

اوہناں نے آکھیا کہ کاؤنٹر بیانیہ جو میڈیا نے رلکے بنایا اے کہ نواز شریف وڈا کرپٹ اے، نواز شریف اُتے الزامات نیں، پر ایہ سارا جس طریقے نال ہو رہیا اے ۔ مثلن اج جس طریقے نال عدالت نے فیصلا سُنایا اے تے جس طرحاں فیصلے دے اعلان وچ دیر کیتی گئی اے کیہ ایس طرحاں عدالتاں فیصلے سُناندیاں نیں؟عدالت نے اک جھیڑوا( متنازعہ)فیصلا سُنایا اے۔ جیہدے اُتے عامر متین نے آکھیا کہ حامد میر صاحب پتا نہیں تُسیں کیہڑے لوکاں نال مل کے آئے او، عدالت وچ فیصلے ویلے آصف کرمانی توں وکھ کوئی ہور مسلم لیگ (ن) دا لیڈر تک نہیں سی۔

حامد میر نے آکھیاکہ فیصلا سُنان وچ دیر کرن اُتے عدالت دے حوالے نال لوکائی (عوام) وچ غلط پیغام تے غلط تاثر گیا اے۔ ہن کوئی ہور ایہنوں منے یاں نہ منے پر ایہ جس طریقے نال عدالت وچ فیصلا سُنایا گیا اے ۔ ایہدے اُتے کئی سوال کھڑے ہو گئے نیں تے کئی لوک ایتھوں تیکر آکھ رہے نیں کہ جج محمد بشیر وی شاید فیصلے دی اُڈیک وچ سن ، ایس لئی فیصلے وچ دیر کیتی گئی۔