راولپنڈی( پاکستان پوائنٹ نیوز06۔جولائی۔2018ء ) عوامی مسلم لیگ دے سربراہ شیخ رشید احمد نے آکھیا اے کہ نواز شریف نوں سزا مگروں ہلکی پُھلکی موسیقی ہو سکدی اے، لوک آؤندے تے چلے جاندے نیں، پاکستان ہمیشہ قائم رہوے گا، کئی وار شک ہوندا اے چلمن پچھے کُجھ ہور پک رہیا اے۔جمعے نوں شیخ رشید احمد نے ایو ن فیلڈ ریفرنس کیس دے متوقع فیصلے بارے ردعمل دیند ے ہوئے آکھیا کہ اڈیالا جیل وچ نواز شریف نال کیہ ہونا اے، نہیں جاندا، نواز شریف نوں سزا مگروں ہلکی پُھلکی موسیقی ہو سکدی اے۔
لوک آؤندے تے چلے جاندے نیں ۔پاکستان ہمیشہ قائم رہوے گا۔اوہناں دا کہنا سی کہ کئی وار شک ہوندا اے کہ چلمن پچھے کُجھ ہور پک رہیا اے۔سزا ہوئی تے نواز شریف نوں 8دناں وچ اپیل لئی آنا پئے گا۔ اوہناں دا ہور کہنا سی کہ نواز شریف دی سزا مگروں شاہد خاقان عباسی پارٹی دی کمان سنبھالن گے۔چیتے رہوے کہ اج احتساب عدالت ولوں ایون فیلڈ ریفرنس کیس دا فیصلا سُنا دتا گیا اے۔
فیصلے دے تحت سابق وزیر اعظم نواز شریف نوں 10، اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف اُتے 10ملین پاؤنڈ تے مریم نواز اُتے 2ملین پاؤنڈ جرمانہ وی کیتا گیا اے۔ نواز شریف تے مریم نواز لندن وچ موجود نیں جدکہ کیپٹن (ر) صفدر ایس ویلے مانسہرہ وچ انتخابی مہم چلا رہے نیں۔ احتساب عدالت توں سزا ہون مگروں پولیس دی اک اُچیچی ٹیم کیپٹن (ر) صفدر نوں گرفتار کرن لئی مانسہرہ چلی گئی اے۔
