لاہور( پاکستان پوائنٹ نیوز06۔جولائی۔2018ء ) پاکستان مسلم لیگ (ن) دی مرکزی رہنما مریم نواز نے احتساب عدالت دے فیصلے نوں رد کردے ہوئے آکھیاکہ شاباش نواز شریف!تُسیں ڈرے نہیں، فتح تہاڈی ہوئے گی،پاکستان وچ 70سال توں سرگرم نادیدہ طاقتاں ساہمنے ڈٹ جان دی ایہ سزا بہت تھوڑی اے، اج ظلم خلاف لڑن دا حوصلا ہور اُچا ہو گیا۔ تفصیل مطابق مسلم لیگ (ن) دے قائد میاں محمد نواز شریف دی دھی مریم نواز نے احتساب عدالت دے فیصلے اُتے اپنے ردعمل وچ آکھیا کہ پاکستان وچ 70سال توں سرگرم نادیدہ طاقتاں ساہمنے ڈٹ جان دی ایہ سزا بہت تھوڑی اے۔ اج ظلم خلاف لڑن دا حوصلا ہور اُچا ہو گیا۔ اوہناں نے آکھیا کہ شاباش نواز شریف!تُسیں ڈرے نہیں، تُسیں جھکے نہیں،تُسیں ذاتی زندگی اُتے پاکستان نوں ترجیح دتی۔ لوک تہاڈے نال کھلوتے نیں۔ فتح تہاڈی ہوئے گی۔اشناء اللہ!۔ مریم نواز نے اپنے اک ہور ٹویٹ وچ آکھیا کہ نواز شریف آ رہیا اے۔ تد ای تے اوہنوں روکن دیاں کوششاں کیتیاں جا رہیاں نیں۔ اج آخری کوشش سی۔ انشاء اللہ پہلاں وانگ ناکامی ہوئے گی۔ مریم نواز نے پارٹی قائد نواز شریف دی تصویر وی شیئر کیتی۔
چیتے رہوے کہ اج احتساب عدالت ولوں ایون فیلڈ ریفرنس کیس دا فیصلا سُنا دتا گیا اے۔ فیصلے دے تحت سابق وزیر اعظم نواز شریف نوں 10تے اوہناں دی دھی مریم نواز نوں 7تے داماد کیپٹن (ر) صفدر نوں اک سال قید دی سزا سُنائی گئی اے۔ نواز شریف اُتے 10ملین پاؤنڈ تے مریم نواز اُتے 2ملین پاؤنڈ جرمانہ وی کیتا گیا اے۔ نواز شریف تے مریم نواز لندن وچ موجود نیں جدکہ کیپٹن (ر) صفدر ایس ویلے مانسہرہ وچ انتخابی مہم چلا رہے نیں۔ احتساب عدالت توں سزا ہون مگروں پولیس دی اک اُچیچی ٹیم کیپٹن (ر) صفدر نوں گرفتار کرن لئی مانسہرہ چلی گئی اے۔
