لاہور( پاکستان پوائنٹ نیوز05۔جولائی۔2018ء ) نواز شریف نے ’ہیرو‘ وانگ گرفتاری دین دی تیاری کر لی۔ مشہور پرچا کار رؤف کلاسرا دا کہنا اے کہ سابق وزیر اعظم نواز شریف نے 2007وچ جدوں جلاوطنی مگروں پاکستان واپس آنا سی۔ اودوں نواز شریف نوں سعودی عرب والیاں نے روکیا سی کہ 10سال دا معاملا اے ایس لئی تُسیں اجے پاکستان جان دا فیصلا نہ کرو پر نواز شریف نے آکھیا کہ نہیں میں تے باغی آں، میں ملک واپس جاواں گا، میں اسلام آباد ائر پور ٹ اُتے اُترنا اے۔
اوس ویلے نواز شریف دے ساتھیاں نے اوہناں نوں یقین دوایا سی کہ جدوں تُسیں پاکستان آؤ تے بہت وڈی گنتی وچ لوک اکٹھے ہون گے تے ایہ کسے وی لیڈر دا تاریخی استقبال ہوئے گا۔ پرویز مشرف دی تے جرات وی نہیں ہوئے گی کہ اوہ تہانوں گرفتار کرن ۔ پر جدوں نواز شریف نے جہاز وچ بِہ کے پاکستان وچ موجود ساتھیاں نال رابطہ کرن دی کوشش کیتی تے سبھ دے نمبر بند جا رہے سن۔
فیر پتا لگا کہ نواز شریف دا اک ورکر وی اسلام آباد ائر پورٹ اُتے نہیں اے۔ اودوں احسن اقبال نے اک ڈرامہ کر کے اپنے آپ نوں پولیس دے حوالے کیتا تے میڈیا وچ تصویراں بنوائیاں۔ جدوں نواز شریف ائر پورٹ اپڑے تے کوئی وی اوتھے نہیں سی۔ ائر پورٹ اُتے موجود لوکاں نے اوہناں نوں گھسیٹ کے باتھ روم وچ بند کیتا تے فیر گھسیٹ کے لے گئے۔ تے ہن وی نواز شریف دے ذہن وچ 2007والا ماڈل چل رہیا اے کہ اوہ سزا ہون مگروں جدوں پاکستان آن گے تے لکھاں دا مجمع اوہناں دا استقبال کرے گا تے ایس طرحاں لوکاں دی بھیڑ وچ نواز شریف گرفتاری دے کے اپنے آپ نوں ہیرو ثابت کرن دی کوشش کرن گے تے فیر ہیرو بن کے نواز شریف جیل جان گے۔
رؤف کلاسرا دا کہنا سی کہ ہن حالات بدل گئے نیں۔ ووٹراں نوں سمجھ آ گئی اے کہ ساڈے حکمران کرپٹ نیں تے جدوں (ن) لیگ حکومت وچ نہ ہوئے تے اوہناں دا ورکر باہر نہیں نکلدا۔
