جنوبی وزیرستان( پاکستان پوائنٹ نیوز04۔جولائی۔2018ء ) فاٹا وچ مسلم لیگ (ن) الیکشن توں پہلاں ای ہار گئی۔این اے 49توں مسلم لیگ (ن) دا انتخابی امیدوار تحریک انصاف دے حق وچ بِہ گیا۔ تفصیل مطابق پچھلے اک سال دے اندر اندر تحریک انصاف نے جس طرحاں پاکستانی سیاست وچ پیر رکھدے ہوئے اپنی سیاسی ساکھ نوں پکا کیتا اے، اوہدی پاکستانی سیاسی تاریخ وچ گھٹ ای مثال لبھدی اے۔
اک پاسے تحریک انصاف دی مضبوط ہوندی ہوئی سیاسی پوزیشن تے دوجے پاسے اوہدیاں حریف جماعتاں دی ڈگدی ہوئی ساکھ نے تحریک انصاف نوں پاکستانی سیاست دی وڈی جماعت بنا دتا اے۔پر ہن جنوبی وزیرستان دے قومی اسمبلی دے حلقہ این اے 49توں مسلم لیگ(ن) دے امیدوار دلاور خان تحریک انصاف دے امیدوار دے حق وچ بہ (دستبردار) گئے۔ دلاور خان محمود نے اپنی پوری کابینہ سنے تحریک انصاف دی حمایت دا اعلان کر دتا اے۔ایس موقعے تے دلاور خان دا کہنا سی کہ مسلم لیگ (ن) تے تحریک انصاف قومی پدھر(سطح) اُتے سیاسی حریف نیں پر میں تحریک انصاف دی حمایت دا اعلان علاقے دے اتحاد نوں مُکھ رکھدے ہوئے کیتا۔ اوہناں دا ہور کہنا سی کہ اسیں ایہ کم ایس لئی وی کیتا اے کہ دنیا وچ ایہدی مثال بن جائے۔
