لاہور( پاکستان پوائنٹ نیوز05۔جولائی۔2018ء ) اُڈان دوران عمران خان نال بیٹھے بندے نے کپتان دی کال ریکارڈ کر لی۔ تفصیل مطابق کُجھ دن پہلاں پاکستان تحریک انصاف دے چیئرمین عمران خان نے اپنی بیوی بشری بی بی نال پاکپتن وچ مشہور صوفی پنجابی شاعر بابا فرید دے مزار اُتے حاضری دتی۔ ایس موقعے تے عمران خان نے درگاہ نوں چُمیا وی ۔ جیہدے مگروں سوشل میڈیا ورتیندڑاں ولوں اوہناں نوں تنقید دا نشانہ بنایا گیا۔
عمران خان نے ایہدی وضاحت کردے ہوئے آپ وی اک بیان دتا سی کہ میں درگاہ نوں عقیدت نال چُمیا سی۔ ایس طرحاں عمران خان دی اک ہور ویڈیو وائرل ہو رہی اے جیہدے وچ اوہ کسے نوں فون اُتے درگاہ اُتے سجدہ کرن بارے دس رہے نیں۔ ایہ ویڈیو جہاز وچ بیٹھے بنائی گئی اے۔ دسیا جا رہیا اے کہ عمران خان کراچی توں اسلام آباد دی کمرشل اُڈان وچ سوار ہوئے تے نال بیٹھے مسافر نے ویڈیو بنانا شروع کر دتی۔
ایس ویڈیو وچ عمران خان دی کال وی ریکارڈ ہو گئی۔ عمران خان فون اُتے آکھ رہے نیں کہ اک گل یاد رکھنا جو کلمہ گو ہوندا اے اوہ کدے وی شرک نہیں کردا۔ کیونکہ اوہ کلمے اُتے یقین رکھدا اے۔ جدکہ عقیدت تے پیار وکھ شے اے۔ جدوں اسیں کسے توں متاثر ہوندے آں تے اوہدی عقیدت وچ کیتا جان والا احترام عاجزی ہوندا اے ۔ ایہدا مطلب ایہ نہ سمجھو کہ اللہ نال کسے نوں شریک کیتا جا رہیا اے۔ عمران خان دا کہنا سی کہ جو صوفی ازم پڑھدے نیں اوہناں نوں ایہ گل چنگی طرحاں پتا اے۔ تُسیں وی مولانا رومی نوں پڑھو۔ تہانوں پتا لگ جائے گا کہ مرشد نال کِنا عشق ہوندا اے تے مرشد نال عشق نوں کدی وی شرک نال نہ رلاؤ۔
