فیصل آباد( پاکستان پوائنٹ نیوز02۔جولائی۔2018ء ) الیکشن 2018توں پہلاں ای ملک دیاں وڈیاں سیاسی جماعتاں نوں کئی قسم دیاں اوکڑاں دا ساہمنا اے،ایہناں اوکڑاں وچوں وڈی اوکڑ امیدواراں دا پارٹی ٹکٹ نوں چھڈ کے آزاد حیثیت وچ الیکشن لڑن دا فیصلا اے۔ تفصیل مطابق عام انتخابات نیڑے آؤندے ای آزاد حیثیت وچ الیکشن لڑن دا ٹرینڈعام ہو گیا اے۔ فیصل آباد توں پی ٹی آئی دے امیدواراں نے وی آزاد حیثیت وچ الیکشن لڑن دا اعلان کر دتا اے۔
میڈیا رپورٹس مطابق پی پی 97توں اجمل چیمہ، 103توں سردار بہادر خان آزاد حیثیت وچ جدکہ پی پی 102توں رائے اعجاز کھرل ٹی ایل پی (تحریک لبیک پاکستان) دے ٹکٹ اُتے الیکشن وچ حصہ لین گے۔ این اے 101توں پی ٹی آئی دے رہنما ظاہر اولکھ وی آزاد حیثیت وچ ای الیکشن لڑن گے۔ این اے 102توں پی ٹی آئی دے رہنما عمیر وصی پاکستان پیپلز پارٹی دے ٹکٹ اُتے الیکشن وچ حصہ لین گے۔ ایس توں وکھ این اے 103تے پی پی 102توں خالد محمود وی آزاد حیثیت وچ الیکشن لڑن گے۔ پی پی 104توں پی ٹی آئی رہنما رانا نعیم اقبال وی آزاد حیثیت وچ الیکشن دا حصہ بنن گے۔
