اسلام آباد( پاکستان پوائنٹ نیوز02۔جولائی۔2018ء ) نجی ٹی وی چینل دے پروگرام وچ گل بات کردے ہوئے مشہور پرچا کار محمد مالک نے آکھیا کہ مسلم لیگ (ن) دے اک رہنما نے وڈا بیان دیند ے ہوئے آکھیا کہ اک بندہ آیا اوہنے مینوں آکھیا کہ میں آئی ایس آئی توں آں ہٹ جاؤ۔ ایہدے مگروں لندن وچ میاں صاحب نے ز بردست بیان دتا تے اودھر اوہ بندہ اپنی گل توں مُکر گیا۔
محمد مالک نے آکھیاکہ شہباز شریف نے اپنے انٹرویو وچ آکھیا کہ نویں عمرانی سمجھوتے داویلا آ گیا اے ۔ بنیادی طور اُتے اوہناں نے آئین بارے نظرثانی دی گل کیتی اے تے آکھیا اے کہ ملک دے سیاستداناں تے فوجیاں نوں بِہ کے گل کرنی چاہیدی، اسیں ایس ملک نوں رلکے چلانا اے۔ محمد مالک نے آکھیاکہ سِدھا آئی ایس آئی تے فوج دا ناں لے کے کیوں بیان دتے جا رہے نیں، جے (ن) لیگی امیدوار نے سچ بولیا اے تے اوہدیاں تحقیقات ہونیاں چاہیدیاں پر جے اوہنے جھوٹھ بولیا اے تے (ن) لیگی قیادت نوں چاہیدا کہ اوہدے توں ٹکٹ واپس لئے۔
اوہناں نے سوال کیتا کہ الیکشن دے معاملے اُتے دوویں بھراواں دے بیاناں وچ فرق کیوں اے؟ایہدے بارے گل بات کردے ہوئے سینئر پرچا کار و تجزیہ کار حامد میر نے آکھیا کہ دوویں بھراواں دے بیانیے وچ اینا فرق اے کہ شہباز شریف ذرا احتیاط توں کم لے رہے نیں، میری اج ای اوہناں نال گل ہوئی، شہباز شریف نوں وی مجبور کیتا جا رہیا اے کہ اوہ نواز شریف دا بیانیہ اپنا لین، بہت سارے واقعات اوہناں نال وی ہو رہے نیں تے اوہناں دے ساتھیاں نال وی نیں۔
انج لگ رہیا اے کوئی طاقت اے جیہنے تحریک بحالی نواز شریف شروع کر دتی اے، کیونکہ جدوں مسلم لیگ (ن) دے امیدواراں نال انج دیاں حرکتاں ہون گیاں تے فیر جو مرضی وضاحت آ جائے، لوکاں نوں ساری گل سمجھ آ رہی اے جیویں کہ مسلم لیگ (ن) دے جنوبی پنجاب توں جو ٹکٹ ہولڈرز نیں، اوہناں دے ٹکٹ واپس کروا کے اوہناں نوں جیپ اُتے چڑھا دتا گیا اے۔
