لاہور( پاکستان پوائنٹ نیوز30۔جون2018ء ) پاکستان مسلم لیگ (ن) دی مرکزی رہنما مریم نواز این اے 125توں آزاد حیثیت وچ الیکشن لڑن گیاں، الیکشن کمیشن نے مریم نواز نوں انتخابی نشان ’پنسل‘ الاٹ کر دتا اے۔ میڈیا رپورٹس مطابق مریم نواز فیر اپنے جدی حلقے توں میدان وچ اُترن گیاں۔ مریم نواز نے پارٹی کارکناں تے حلقے دی لوکائی دیاں خاہشاں نوں مُکھ رکھدے ہوئے این اے 125توں فیر الیکشن لڑن دا فیصلا کر لیا اے۔
مریم نواز این اے 125توں آزاد حیثیت وچ الیکشن لڑن گیاں۔ دوجے پاسے پارٹی وسیلیاں دا کہنا اے کہ مسلم لیگ (ن) دی مرکزی رہنما مریم نواز این اے 127توں ای الیکشن وچ حصہ لین گیاں۔ مریم نواز نوں این اے 127توں پارٹی ٹکٹ جاری کیتا گیا اے۔ مریم نواز دے کاغذات نامزدگی واپس نہیں لِتے جا سکے ایس لئی الیکشن کمیشن نے اوہناں نوں این اے 125توں وی انتخابی نشان الاٹ کر دتا اے۔
مریم نواز نوں الیکشن کمیشن نے ’پنسل‘ دا انتخابی نشان الاٹ کیتا اے۔ ایس توں وکھ پی ٹی آئی دی این اے 125توں امیدوار یاسمین راشد دا کہنا اے کہ مریم نواز اپنا جدی حلقہ چھڈ کے نس گیاں نیں۔ اوہناں نے آکھیا کہ حلقے دی لوکائی نوں سوچنا پئے گا کہ مریم نواز دے والد ایسے حلقے توں تن وار وزیر اعظم چُنے گئے۔ پر مریم نواز اج ایہ انتخابی حلقہ کیوں چھڈ گیاں نیں۔ کیونکہ مریم نواز نوں یقین اے کہ اوہ ایس حلقے توں نہیں جِت سکن گیاں۔
