لاہور( پاکستان پوائنٹ نیوز30۔جون2018ء ) ملک بھر توں الیکشن 2018 وچ حصہ لین والے 2بیویاں والے امیدواراں دے ناں ساہمنے آ گئے نیں، شہباز شریف، حمزہ شہباز، خواجا سعد رفیق، جمشید چیمہ، زبیر کاردار، ڈاکٹر اشرف جلالی، رانا مبشر اقبال تے ہور امیدوار شامل نیں۔ میڈیا رپورٹس مطابق الیکشن وچ حصہ لین والے وکھ وکھ سیاسی جماعتاں دے امیدواراں دے کاغذات نامزدگی توں پتا لگا اے کہ الیکشن وچ ایس طرحاں دے وی امیدوار حصہ لے رہے نیں جیہناں دیاں 2،2بیویاں نیں۔
الیکشن وچ دو دو بیویاں ہون دی وجہ توں اوہناں دے جِتن دے جانسز وی ودھ گئے نیں۔ کیونکہ ہن الیکشن وچ ایہناں امیدواراں دی جت لئی اک نہیں بلکہ دو دو بیویاں سپورٹ تے دعاواں کرن گیاں۔ الیکشن 2018وچ دو بیویاں والے قومی اسمبلی دے امیدواراں وچ مسلم لیگ (ن) دے صدر شہباز شریف وی شامل نیں، اوہناں دیاں بیویاں دے ناں تہمینہ درانی تے نصرت شہباز شریف نیں۔
سابق وزیر اعلا دے پُتر حمزہ شہباز دیاں وی دو بیویاں نیں جیہناں دے ناں رابعہ شہباز تے مہرالنساء حمزہ اے۔ ایس طرحاں سابق وزیر ریلوے خواجا سعد رفیق دیاں وی دو بیویاں نیں غزالہ رفیق تے شفق حرا ۔ تحریک انصاف دے این اے 127توں مریم نواز دے مقابلے وچ امیدوار جمشید اقبال چیمہ دیاں دی دو بیویاں نیں جیہناں دے ناں مسرت جمشید تے نسیم چیمہ نیں۔ ایسے طرحاں پیپلز پارٹی رہنما زبیر کاردار دیاں دو بیویاں صباء زبیر تے ناہید اختر نیں۔ ایس توں وکھ مسلم لیگ (ن) دے رہنما مبشر اقبال ومذہبی جماعت تحریک لبیک دے امیدوار ڈاکٹر آصف اشرف جلالی تے ہور امیدواراں دیاں دو دو بیویاں نیں۔
