اسلام آباد( پاکستان پوائنٹ نیوز27۔جون2018ء ) عام انتخابات2018نوں مُکھ رکھدے ہوئے ساریاں سیاسی جماعتاں نے نویں نعرے تے اپنی الیکشن مہم لئی نویں نویں گانے متعارف کروا دتے نیں۔ میڈیا رپورٹس مطابق پاکستان تحریک انصاف دی الیکشن مہم لئی پاکستانی گلوکار فرحان سعید گانا گان گے تے ایس سلسلے وچ اوہناں نے پی ٹی آئی چیئرمین عمران خان نال اوہناں دے گھر بنی گالا وچ ملاقات وی کیتی۔ ملاقات دیاں تصویراں میڈیا اُتے وائرل ہوگئیاں نیں۔ فرحان سعید دی پی ٹی آئی چیئرمین عمران خان نال تصویراں وائرل ہون اُتے ٹویٹر ورتیندڑاں نے حمزہ علی عباسی نال چھیڑ چھاڑ شروع کر دتی، تے آکھیا کہ حمزہ علی عباسی نوں عمران خان دا قریبی ساتھی سمجھیا جاندا اے ،فرحان سعید دیاں عمران خان نال تصویراں ویکھ کے حمزہ علی عباسی نوں بہت دُکھ ہویا ہوئے گا۔ اک ٹویٹر ورتیندڑ(صارف) نے تے ایس ملاقات اُتے حمزہ علی عباسی دے ردعمل دی اک مزاحیہ تصویر وی بنا دتی تے لکھیا کہ ایہ تصویر ویکھ کے حمزہ علی عباسی دی ایس طرحاں دی حالت ہوئے گی۔
پر جدوں ایہ تصویر پی ٹی آئی چیئرمین عمران خان دی دوجی سابق بیوی ریحام خان دی نظروں لنگھی تے اوہ تبصرہ کیتے بغیر نہ رہ سکیاں۔ اپنے ٹویٹر پیغام وچ ریحام خان نے مخولیا انداز وچ حمزہ علی عباسی نوں خشخبری وی سنا دتی۔ ریحام خان نے اپنے ٹویٹر پیغام وچ لکھیا کہ جے پی ٹی آئی نے کوئی نواں چہرہ لبھنا اے تے کوئی گل نہیں، میں اپنی نویں فلم وچ حمزہ علی عباسی لئی اک نواں کردار لکھیا اے۔نال ای اوہناں نے ہیش ٹیک وچ ’میں ہو ں نا‘ وی لکھیا۔
