اسلام آباد( پاکستان پوائنٹ نیوز27۔جون2018ء ) سپریم کورٹ آف پاکستان وچ کالا باغ ڈیم بارے کیس دی سنوائی ہوئی۔ کیس دی سنوائی چیف جسٹس آف پاکستان جسٹس ثاقب نثار دی سربراہی وچ تن رکنی بنچ نے کیتی۔ چیف جسٹس آف پاکستان نے کالا باغ ڈیم بارے کیس دی سنوائی دوران آکھیاکہ ایہ ڈیم ہر صورت بننا اے، نہیں پتا کہ ایہ ڈیم میری زندگی وچ بندا اے یاں نہیں، ڈیم دی اُساری وچ سبھ توں پہلاں حصہ عدالت پائے گی۔
چیف جسٹس نے ریمارکس دتے کہ ملک ریاض وی عدالتی کمرے وچ موجود نیں، ملک ریاض توں میں سارا پیسہ لے لینا اے۔ اوہناں نے آکھیا کہ قوم نوں بچا لوویاں اپنے مفاد نوں بچاؤ۔ چیف جسٹس نے آکھیا کہ میں ملک ریاض توں پیسہ لے کے ڈیم دی اُساری لئی دے دیواں گا۔ اج سپریم کورٹ وچ کالا باغ ڈیم بارے کیس دی سنوائی ہوئی۔ چیف جسٹس نے شمس الملک نوں مخاطب کردے ہوئے آکھیا کہ عدالت دی رہنمائی کروں کہ اگانہ کیویں ودھیا جائے؟اوہناں نے آکھیا کہ میں پورے وثوق نال آکھنا واں کہ ایہ ڈیم ہر صورت بننا اے۔
کیہڑا ڈیم بندا اے ایہ تہاڈے ورگے ماہرین ای دس سکدے نیں۔ سپریم کورٹ ڈیمز دے معاملے اُتے سبھ توں اگانہ ہوئے گی۔ ڈیمز میری زندگی وچ بنن یاں بعدوں پر ایہ بنن گے ضرور۔ شمس الملک نے عدالت نوں دسیا کہ بلوچستان وچ خشک سالی دی پیشنگوئی 10ورھے پہلاں کیتی گئی سی۔ سنوائی دوران شمس الملک دا کہنا سی کہ جے قیادت تیار ہوئے تے بطور سپاہی کم کراں گا۔
چیف جسٹس نے ریمار کس دتے کہ سوچ رہیا واں کہ عدالتی کم روک کے کالا باغ ڈیم دے معاملے اُتے اک سیمینار کرواں تے ڈیم دی اہمیت بارے چانن پاواں۔ ملک دے قرضے خطرناک حد تیکر ودھ گئے نیں۔ میں چاہنا واں کہ چارے صوبے ڈیمز توں فائدہ چُکن۔چاراں بھراوا ں نوں ڈیمز لئی قربانی دینی پئے گی۔ چیف جسٹس نے ریمارکس دتے کہ حیدر آباد دا پانی پین وچ زہر توں گھٹ نہیں اے۔ سپریم کورٹ لاہور رجسٹری توں آرسینک نکلیا۔ میڈیا نوں وی پانی دے معاملے اُتے پروگرام کرنے چاہیدے۔
