کراچی( پاکستان پوائنٹ نیوز27۔جون2018ء ) بجلی دیاں ونڈ کار کمپنیاں دے ذمے دار ادارے نیپرا نے بجلی دی قیمت وچ اک رُپئے 25پیسے وادھا کر دتا اے۔ قیمتاں وچ وادھے دی منظوری مئی دی فیول ایڈجسٹمنٹ دی مد وچ کیتی گئی، جیہدے نال ورتیندڑاں اُتے 15ارب70کروڑ رُپئے دا بھار پئے گا۔ پچھلے مہینے مئی وچ ریفرنس فیول لاگت 5رُپئے 29پیسے فی یونٹ رہی۔ سینٹرل پاور پرچیزنگ ایجنسی نے بجلی دے ریٹ وچ اک رُپئے 32پیسے وادھے دی درخاست دتی سی۔
مئی وچ مہنگے فرنس آئل نال 19.30فیصد بجلی پیدا کیتی گئی، جیہدے اُتے 12رُپئے 47پیسے فی یونٹ لاگت آئی۔ درآمدی ایل این جی نال 23.85فیصد بجلی پیدا کیتی گئی، جیہدے اُتے 9رُپئے 10پیسے فی یونٹ لاگت آئی۔ ممبر نیپرا مطابق سسٹم دے تکنیکی و انتظامی نقصان دی وجہ توں سرکولو ڈبٹ ودھ رہیا اے تے ایہدے نال ہون والا نقصان ورتیندڑ(صارف) نوں دینا پئے گا۔ اوہناں نے آکھیا کہ قطر توں 13رُپئے وچ گیس لِتی جا رہی اے پر بلوچستان نوں چھ رُپئے دین نوں تیار نہیں جے سستی گیس دتی جاندی تے بجلی دی قیمت وچ فی یونٹ صرف 30یاں 35پیسے وادھا کرنا پیندا۔
