سابق آرمی افسر دا وڈیرے بابے اُتے تشدد

لاہور( پاکستان پوائنٹ نیوز22۔جون2018ء ) آرمی دے (ر) میجر نے وڈیرے بابے نوں چپیڑاں مار دتیاں، ایتھوں نس جا، کسے نوں شکایت کیتی تے تھانے بند کروا دیواں گا، فوجی افسر نسدے بابے دی ویڈیو بناندا رہیا۔ تفصیل مطابق ساڈی فوج ساڈا فخر اے، ایہ نہ صرف ساڈے ملک دیاں سرحداں دی محافظ اے بلکہ ہر اوکڑ وچ اگانہہ ودھ کے پاکستانی لوکائی دا ہتھ پھڑ کے پار لنگھاؤندی اے۔ ایس لئی پاکستانی لوکائی سارے اداریاں توں ودھ اپنی فوج نال محبت کردی اے پر ہر تھاں چنگے مندے لوک ہوندے نیں، جیہناں دے اپنے عمل دی وجہ توں پورا ادارہ بدنام ہو جاندا اے۔ ایس طرحاں دے واقعات ساہمنے آؤندے رہندے نیں، جیہدی وجہ توں اداریاں دی ساکھ خراب ہوندی اے۔ اجیہا ای اک واقعہ (ر) آرمی میجر دے ہتھوں پیش آیا جتھے آرمی دے (ر) میجر نے وڈیرے عمر دے مالی نوں چپیڑاں مار دتیاں۔ سابقہ آرمی افسر نے نہ صرف وڈیرے مالی نوں تشدد دا نشانہ بنایا بلکہ اوہنوں دھمکیاں وی دتیاں۔ ایس حوالے نال گل بات کردے ہوئے وڈیرے بابے دا کہنا سی کہ اوس میجر نے نہ صرف مینوں ماریا بلکہ مینوں دھمکی دتی کہ ایتھوں نس جا نہیں تے تھانے وچ بند کروا دیواں گا۔ میں نسن لگا تے اوہنے فون نال ریکارڈنگ کیتی۔ وڈیرے بابے دا کہنا سی کہ میں ڈر دی وجہ توں کسے نوں شکایت وی نہیں کیتی۔ بُڈھا بابا ڈر دی وجہ توں سپریم کورٹ اپڑ گیا۔