اسلام آباد( پاکستان پوائنٹ نیوز22۔جون2018ء ) نگران حکومت نے چیئرمین بے نظیر انکم سپورٹ پروگرام ماروی میمن نوں ہٹان دا فیصلا کر لیا اے۔ وزیراعظم جسٹس (ر) ناصر الملک نے ماروی میمن نوں ہٹان دی سمری صدر مملکت نوں گھل دتی۔ تفصیل مطابق ملک وچ مسلم لیگ (ن) دی جمہوری حکومت اپنی آئینی مدت پوری کرن مگروں 31مئی نوں چلی گئی، جیہدے مگروں نگران سیٹ اپ نے ملک دا انتظام سنبھالیا اے۔
ایس نگران سیٹ اپ دی سبھ توں وڈی ذمے واری شفاف الیکشن کروانا اے۔ ایس گل دا اظہار وزیراعظم سنے سارے وزیر وی کر چکے نیں۔ وفاق سنے سارے صوبیاں وچ اہم وزارتاں سابق بیوروکریٹس، جج صاحبان تے کاروباری بندیاں نوں دتیاں گئیاں نیں جو اپنے شعبیاں وچ کم جاری رکھے ہوئے نیں۔ ایسی صورتحال وچ بہت سارے ادارے ایسے وی نیں جیہناں وچ سابق حکومت ولوں تعینات سیاسی شخصیتاں موجود نیں۔
ایسے ای اداریاں وچوں اک ادارہ بے نظیر انکم سپورٹ اے جیہدی سربراہی ماروی میمن کول سی پر ہن نگران حکومت نے چیئرمین بے نظیر انکم سپورٹ پروگرام ماروی میمن نوں ہٹان دا فیصلا کر لیا اے۔وزیراعظم جسٹس (ر) ناصر الملک نے ماروی میمن نوں ہٹان دی سمری صدر مملکت نوں گھل دتی۔سمری دی منظوری مگروں ماروی میمن عہدے توں فارغ ہو جان گیاں۔
