لاہور( پاکستان پوائنٹ نیوز22۔جون2018ء ) مشہور کالم نگار منصور آفاق دا اپنے اک کالم ’امیدوں کا اکیلا چراغ،عمران خان‘ وچ کہنا اے کہ ایس ویلے دشمن دے راہ وچ صرف اک رکاوٹ اے جیہنوں عمران خان آکھدے نیں۔ ایہ اوہ واحد لیڈر اے جو دشمناں دے سارے ارادیاں مٹی وچ رول سکدا اے۔ اوہناں لئی مسئلا ایہ اے کہ لبرلز عمران خان اُتے تنگ نظر ہون دا الزام نہیں لا سکدے۔
مدینے دیاں گلیاں وچ ننگے پیر پھرن والے نوں کوئی مذہب دشمن قرار نہیں دے سکدا۔ اجیہا پچھوکڑ رکھن والا لیڈر پورے ایمان نال پاکستانی فوج نال کھلوتا اے۔ بے شک ایس ویلے عمران خان فوج ول جان والے ہر وار نوں اپنی کُھلی چھاتی اُتے سہہ رہیا ۔ ایس لئی اوہناں دی زندگی نوں خطرہ اے، اوہناں دی کردار کشی دی مہم وی پورے زور نال جاری اے۔ ایتھوں تیکر کہ سابق چیف جسٹس افتخار محمد چودھری نوں وی میدان وچ لیاندا گیا اے۔
اصل وچ دنیا نوں انتخابات وچ عمران خان دی کامیابی یقینی لگ رہی اے تے ایہ وی لگدا اے کہ جے عمران خان وزیر اعظم بن گیا تے فیر پاکستان نوں ترقی کرن توں کوئی نہیں ڈک سکدا۔ اسیں اک مشکل دور وچ آں۔اوہناں دا کہنا سی کہ سانوں ایس ویلے ،ایس وڈے خطرناک دور توں دھیان نال لنگھنا پئے گا۔ میری صلاح ایہو اے کہ دو تن مہینے لئی انتخابات ملتوی کر دتے جان۔
چیتے رہوے کہ الیکشن 2018نوں پاکستانی تاریخ دا اہم ترین الیکشن قرار دتا جا رہیا اے ۔ ایس الیکشن دی خاص گل ایہ اے کہ ایہدے نتیجے وچ انتقال اقتدار جمہوری انداز نال تیجی حکومت دے سپرد ہوئے گا۔ الیکشن نوں ایس لئی وی اہم قرار دتا جا رہیا اے کہ ایس الیکشن وچ بہت ساریاں سیاسی جماعتاں دا مستقبل وی طے ہوئے گا۔ ایس حوالے نال خاص کر مسلم لیگ (ن) تے پاکستان تحریک انصاف نے الیکشن نوں وڈا سیاسی معرکہ سمجھ کے سیاسی جنگ شروع کر دتی اے۔ ایس ویلے سیاسی جماعتاں ولوں انتخابات دیاں تیاریاں جتھے ٹیسی اُتے نیں اوتھے دوجے پاسے ملکی اداریاں نے وی عام انتخابات دیاں تیاریاں شروع کر دتیاں نیں ۔
