لاہور( پاکستان پوائنٹ نیوز20۔جون2018ء ) غریب لوکائی(عوام) لئی دو ویلے دی روٹی کمانا مشکل ہوندا جا رہیا اے۔ ترجمان پاکستان فلور ملز ایسوسی ایشن دا کہنا اے کہ آٹے دیاں قیمتاں وچ وادھا چھیتی پنجاب بھر وچ لاگو ہوئے گا۔ تفصیل مطابق پاکستان فلور ملز ایسوسی ایشن نے آٹے تے فائن میدے دی قیمت وچ وادھا کر دتا۔ 20کلو آٹے دے تھیلے دی قیمت وچ 20رُپئے جدکہ فائن میدے دی 84کلو گرام بوری دی قیمت وچ 100رُپئے دا وادھا کیتا گیا اے۔
ایس وادھے مگروں 20گرام آٹے دے تھیلے دی ریٹیل قیمت 735رُپئے توں ودھ کے 755رُپئے جدکہ فائن میدے دی 84کلو گرام بوری دی قیمت 3500رُپئے توں ودھ کے 3600رُپئے ہو گئی اے۔ ایسوسی ایشن دے اجلاس وچ دسیا گیا کہ اوپن مارکیٹ وچ کنک دی قیمت وچ لگاتار وادھا ہو رہیا، جیہدی وجہ توں آٹے تے فائن میدے دی قیمت وچ وادھا ضروری اے۔ چیتے رہوے کہ ایس توں پہلاں وی اپریل دے مہینے وچ فلور ملز ایسوسی ایشن ولوں آٹے دیاں قیمتاں وچ وادھے دا اعلان کیتا گیا سی۔ اوس ویلے 20کلو آٹے دی قیمت وچ 20رُپئے دا وادھا ہویا ،وادھے مگروں آٹے دے تھیلے دی قیمت 750رُپئے توں ودھ کے 770رُپئے ہو گئی سی۔ پر اودوں 2دن بعد ای فلور ملز ایسوسی ایشن نے عوامی امنگاں نوں مُکھ رکھدے ہوئے اپنا فیصلا واپس لے لیا سی۔
