عمران خان دی جائیداد دیاں تفصیلاں ساہمنے آ گئیاں

اسلام آباد اندر بنی گالا دا 300کنال دا گھر، لاہور وچ زمان پارک، بھکر تے میاں چنوں وچ زرعی زمین ملکیت وچ شامل

عمران خان دی جائیداد دیاں تفصیلاں ساہمنے آ گئیاں
اسلام آباد اندر بنی گالا دا 300کنال دا گھر، لاہور وچ زمان پارک، بھکر تے میاں چنوں وچ زرعی زمین ملکیت وچ شامل

اسلام آباد( پاکستان پوائنٹ نیوز20۔جون2018ء ) تحریک انصاف دے سربراہ عمران خان دی جائیداد دیاں تفصیلاں ساہمنے آ گئیاں نیں۔ اسلام آباد وچ 6کنال توں ودھ زمین دی قیمت 5لکھ رُپئے، بنی گالا والے گھر دی قیمت 1کروڑ توں ودھ، لاہور وچ زمان پارک، بھکر تے میاں چنوں وچ زرعی زمین وی ملکیت وچ شامل اے۔ تفصیل مطابق تحریک انصاف دے سربراہ عمران خان دی جائیداد بارے تفصیلاں ساہمنے آ گئیاں نیں۔

عمران خان دے ناں اُتے موجود جائیداداں وچ اسلام آباد اندر بنی گالا دا 300کنال دا گھر، لاہور وچ زمان پارک، بھکر تے میاں چنوں وچ زرعی زمین ملکیت وچ شامل اے۔ ایس توں وکھ اسلام آباد وچ اک زیر تعمیر اپارٹمنٹ وی عمران خان دی ملکیت اے۔ عمران خان دی اسلام آبا د وچ موجود 6کنال توں ودھ زمین دی قیمت 5لکھ رُپئے تے بنی گالا والے گھر دی قیمت 1کروڑ رُپئے توں ودھ دسی گئی اے۔

ایس توں وکھ عمران خان دے آمدنی دے وسیلیاں وچ زراعت، تنخاہ، پنشن تے بنک منافع ظاہر کیتا گیا اے۔ عمران خان 169ایکڑ زرعی زمین دے مالک نیں جدکہ عمران خان نے غیر ملکی دوریاں دیاں تفصیلاں وی کاغذات نامزدگی وچ ظاہر کیتیاں نیں۔ عمران خان نے الیکشن کمیشن وچ اپنے پچھلے ورھے دے اثاثے 47لکھ76ہزار611رُپئے ظاہر کیتے نیں۔عمران خان نے اپنی تنخاہ 18لکھ 991رُپئے تے زرعی آمدن 23لکھ 60ہزار رُپئے ظاہر کیتی اے۔

چیئرمین پی ٹی آئی نے اپنے کاغذات نامزدگی وچ ظاہرکیتا اے کہ اوہناں نے 2015توں لے کے 2018تیکر 28غیر ملکی دورے کیتے ، جیہناں وچوں بُہتے دورے سپانسرڈ سن۔ عمران خان نے پچھلے ورھے آمدن اُتے اک لکھ 3ہزار 763رُپئے ٹیکس دتا اے۔ اوہناں نے اپنی بیوی بشری مانیکا تے دو بالاں نوں زیر کفالت ظاہر کیتا اے۔دستاویزات مطابق عمران خان کول کوئی ذاتی گڈی نہیں اے پر گھر وچ موجود فرنیچر تے ہور سامان دی مالیت 5لکھ تے اوہناں کول موجود جنوراں دی قیمت 2لکھ رُپئے اے۔

ایس توں وکھ عمران خان نے اپنے اک اکاؤنٹ وچ 3لکھ70ہزار760ڈالر تے دوجے اکاؤنٹ وچ 1470ڈالر ظاہر کیتے نیں۔ چیئرمین تحریک انصاف ولوں جمع کروائیاں گئیاں دستاویزات مطابق اوہناں دی لاہور تے اسلام آباد سنے پاکستان وچ 14جائیداداں نیں جو اوہناں نوں ورثے وچ ملیاں ۔کاغذات مطابق عمران خان دا پاکستان تے باہرلے ملک کوئی کاروبار تے جائیداد نہیں اے۔