لندن( پاکستان پوائنٹ نیوز20۔جون2018ء ) بیگم کلثوم نواز ہائی رسک اُتے نیں، ڈاکٹراں نے دس دتا۔حسین نواز دا کہنا اے کہ بیگم کلثوم دی حالت اُنجے ای خطرناک اے، ڈاکٹر روز ریویو کردے نیں۔تفصیل مطابق بیگم کلثوم نواز دی حالت خطرناک ای اے۔ نواز شریف تے مریم نواز عید منان لئی لندن اپڑے تے اوہناں دے جان توں اک دن پہلاں ای بیگم کلثوم نواز دی طبیعت وِگڑ گئی۔
طبیعت وِگڑن دی وجہ توں اوہناں نوں اک وار فیر بارلے کلینک منتقل کر دتا گیا۔ جتھوں ایہ خبراں وی آئیاں سن کہ بیگم کلثوم نواز نوں ہارٹ اٹیک ہویا، جیہدی وجہ توں اوہ بے ہوش ہوگئیاں تے اوہناں نوں وینٹی لیٹر اُتے منتقل کر دتا گیا۔کل تیکر اطلاع مطابق بیگم کلثوم نواز دی طبیعت اُنجے ای خراب سی تے بہتری دی کوئی آس وکھالی نہیں دے رہی سی۔ پر رات نوں ایہ خبر آئی کہ کلثوم نواز نے وینٹی لیٹر اُتے جان مگروں اکھاں کھول دتیاں تے اوہناں نوں ہوش آگیا اے۔
ایس حوالے نال ہن ڈاکٹراں نے بیگم کلثوم نواز نوں ہائی رسک قرار دے دتا اے۔ ایس بارے میڈیا نال گل بات کردے ہوئے سابق وزیراعظم نواز شریف دے پُتر حسین نواز دا کہنا سی کہ بیگم کلثوم دی حالت خطرناک اے۔ ڈاکٹر روز ریویو کردے تے سانوں ایس بارے دسدے نیں۔ اوہناں دا ہور کہنا سی کہ ڈاکٹراں مطابق کلثوم نواز دی حالت بہتر اے۔ کلثوم نواز بے ہوشی وچ نیں، کُجھ نہیں آکھ سکدے کہ اوہ گل سُندیاں نیں یاں نہیں۔ اوہناں نے صورتحال واضح کردے ہوئے دسیا کہ ڈاکٹراں مطابق بیگم کلثوم نواز اجے تیکر ہائی رسک اُتے نیں ایس لئی کوئی ٹائم فریم نہیں دے سکدے۔
