اسلام آباد( پاکستان پوائنٹ نیوز20۔جون2018ء ) نجی ٹی وی چینل دے پروگرام وچ گل بات کردے ہوئے مشہور پرچا کار صابر شاکر نے آکھیا کہ تقریبن چھ توں اٹھ مہینے پہلاں دی گل اے جدوں بیگم کلثوم نواز نوں علاج لئی لندن لیجایا گیا۔ اوتھے اوہناں دا اعلاج کرن والے دو ڈاکٹر سن۔ کلثوم نواز دے علاج مگروں اک وار فیر اوہناں دے گلے وچ کینسر دا اثر نظر لگا، جیہدے اُتے ڈاکٹراں دا کہنا سی کہ ہن چھ توں اٹھ مہینیاں دا ویلا اے۔
صابر شاکر دا کہنا سی کہ جے اسیں کلثوم نواز دے فوت ہون دیاں افواہواں تے ڈاکٹراں دی اودوں دی آکھی گل دا جائزہ لئے تے ایہو چھ اٹھ مہینے نواز شریف تے مریم نواز نے احتساب عدالت وچ لنگھائے نیں۔ اوہناں نے اپنے روڈ میپ مطابق احتساب عدالت وچ کیساں نوں 9ویں مہینے وچ داخل کر دتااے۔ اوتھوں جو ڈاکٹراں دی رائے سی، اوہدے مطابق نواز شریف تے مریم نواز احتساب عدالت وچ اپنے مقدمے نوں اگانہ لے کے ودھے نیں۔
صابر شاکر دا کہنا سی کہ حسین نواز نے میڈیا نال گل بات کردے ہوئے آکھیا کہ بیگم کلثوم نواز دا وینٹی لیٹر ان متھے چِر لئی(غیر معینہ مدت) رہوے گا ، کیہ ایہ کوئی قومی اسمبلی دا اجلاس اے ،جو ان متھے چِر لئی اے؟ایہ اکھر تے کئی وار اسمبلی نوں آکھدے سُنیا اے۔صابر شاکر نے آکھیا کہ حسین نواز دے اکھر سُن کے اِنج لگدا کہ ایہ کوئی قومی اسمبلی دا اجلاس اے، جو اوہناں نے آکھیاکہ والدہ دا وینٹی لیٹر ان متھے چِر لئی رہوے گا۔
صابر شاکر نے آکھیاکہ ایس حوالے نال میں کُجھ ڈاکٹراں کولوں پُچھیا کہ وینٹی لیٹر ان متھے چِر تیکر رہن دا کیہ مطلب اے؟جیہدے اُتے ڈاکٹر نے مینوں اک مثال دتی کہ شاہد خاقان عباسی دا بھرا کیمپ وچ زخمی ہویا سی، اوہنوں دس سال وینٹی لیٹر اُتے رکھیا گیا، دس سال مگروں اوہناں دے خاندان نے فیصلا کیتا کہ وینٹی لیٹر ہٹا دتا جائے، تے جیویں ای وینٹی لیٹر ہٹایا گیا اوہ چلانا کر گے، جیہدا باقاعدہ اعلان کر دتا گیا۔
ڈاکٹر دا کہنا اے کہ جدوں ایہ آکھیا جاندا اے کہ وینٹی لیٹر ان متھے چر لئی رہوے گا تے ایہدا مطلب ایہ ہوندا اے کہ دماغی طور اُتے روگی دی موت ہو جائے تے اوہدے مگروں وارثاں دی مرضی ہوندی اے کہ ڈاکٹراں نوں کدوں وینٹی لیٹر توں ہٹان دی اجازت دینی اے تے جیویں ای روگی دا وینٹی لیٹر ہٹانے آں تے اوہدے فوت ہون دا باقاعدہ اعلان کر دتا جاندا اے۔صابر شاکر دا کہنا سی کہ جے حسین نواز دی ایس گل نوں من لیا جائے کہ بیگم کلثوم نواز دا وینٹی لیٹر ان متھے چِر تیکر رہوے گا تے ہن شریف خاندان نے فیصلا کرنا اے کہ کلثوم نواز دا وینٹی لیٹر کدوں ہٹایا جائے۔ صابر شاکر دا کہنا سی کہ بیگم کلثوم نواز دی بیماری تے اوہناں دے وینٹی لیٹر نوں سیاسی مقصداں لئی ورتیا جا رہیا اے۔
