اسلام آباد( پاکستان پوائنٹ نیوز20۔جون2018ء ) نیب نے سابق وزیر اعظم نواز شریف خلاف خشحال پاکستان سکیم انکوائری بند کر دتی، نواز شریف خلاف انکوائری ثبوت نہ ہون دی وجہ توں بند کیتی گئی، نیب اجلاس وچ نواز شریف دے داماد کیپٹن (ر) صفدر تے امیر مقام خلاف آمدن توں ودھ اثاثے بنان بارے انکوائری دی منظوری دے دتی گئی اے۔ میڈیا رپورٹس مطابق چیئرمین نیب جسٹس (ر) جاوید اقبال دی صدارت ہیٹھ ایگزیکٹو بورڈ دا اجلاس ہویا۔
اجلاس وچ نیب دے وڈے افسراں نے رلت کیتی۔ اجلاس وچ نیب وچ وکھو وکھ جاری تے التواء ہیٹھ پئے ریفرنسز دا وی جائزہ لیا گیا۔ ایس موقعے تے چیئرمین نیب جسٹس (ر) جاوید اقبال نے سابق وزیر اعظم نواز شریف خلاف خشحال پاکستان سکیم کیس انکوائری بند کرن دی منظوری دتی اے۔ مسلم لیگ (ن) دے قائد نواز شریف خلاف انکوائری ثبوت نہ ہون دی وجہ توں بند کیتی گئی۔
نیب نے چودھری شجاعت تے چودھری پرویز الہی خلاف وی تحقیقات بند کرن دی منظوری دے دتی اے۔ نیب دا کہنا اے کہ چودھری برادران خلاف انکوائری ثبوت نہ ہون دی وجہ توں بند کیتی گئی اے۔ ایس طرحاں نواز شریف دے داماد کیپٹن (ر) صفدر خلاف آمدن توں ودھ اثاثیاں دی انکوائری دی منظوری دے دتی گئی اے۔ اجلاس وچ چیئرمین سی ڈی ، بحریہ ٹاؤن تے ڈی ایچ اے خلاف تحقیقات دی منظوری دے دتی گئی اے۔
ایس توں وکھ اظہار حسین کھوسہ خلاف کرپشن ریفرنس دائر کرن دی منظوری دتی گئی۔ وی سی ایگریکلچرل یونیورسٹی ٹنڈوجام مجیب خلاف وی کرپشن دے الزاماں دی تفتیش دی منظوری دتی گئی۔ ضیاء الحسن النجار خلاف آمدن توں ودھ اثاثے بنان تے 12کروڑ رُپئے دی کرپشن دا الزام اے۔ نیب نے سابق سی پی او ملتان عامر ذوالفقار خلاف وی کرپشن دے الزاماں دیاں تحقیقات دی منظوری دے دتی اے۔
