لاہور( پاکستان پوائنٹ نیوز11۔جون2018ء ) سپریم کورٹ لاہور رجسٹری وچ عائشہ احد کیس دی سنوائی ہوئی۔ سنوائی دوران عائشہ احد تے حمزہ شہباز وی عدالت وچ پیش ہوئے۔ سنوائی دوران عائشہ احد دا کہنا سی کہ میرا حمزہ نال 2010وچ ویاہ ہویا سی۔ غلام حسین تے سرور ساڈے نکاح دے گواہ نیں۔ ویاہ مگروں حمزہ مینوں ذلیل کردا رہیا اے۔ جدکہ حمزہ شہباز شریف نے عدالت وچ بیان دیند ے ہوئے آکھیا کہ میرا عائشہ نال ویاہ نہیں ہویا، چیف جسٹس نے حمزہ شہباز نال مکالمہ کردے ہوئے آکھیا کہ تُسیں مینوں اپنا وڈا سمجھو، میں تہانوں دوواں نوں پُتر تے دھی مننا واں۔
تُسیں چاہو تے میں ایہ مسئلا حل کروا سکداں آں۔ چیف جسٹس دا کہنا سی کہ میں تہاڈے دوواں وچ ثالث دا کردار ادا کر سکدا آں۔ حمزہ آکھدا اے کہ ویاہ نہیں ہویا،تے میں ایس مسئلے اُتے جے آئی ٹی بنا دینا واں۔ چیف جسٹس نے ہور آکھیا کہ میں دوویں فریقاں دا موقف سُننا چاہنا واں۔ سنوائی دوران حمزہ شہباز شریف دے وکیل دا کہنا سی کہ عائشہ احد تے حمزہ شہباز دے ویاہ دا کوئی ثبوت نہیں ہے۔ سنوائی دوران حمزہ شہباز دے وکیل زاہد حسن بخاری نے دلائل دین دی کوشش کیتی۔ چیف جسٹس نے اوہناں نوں روک دتا۔ تے حمزہ دے وکیل دا کہنا سی کہ چیف جسٹس صاحب میں تہاڈا احترام کرنا واں جواب وچ چیف جسٹس نے آکھیا کہ تُسیں ادب نہیں کرو گے تے سانوں کروانا آؤندا اے۔
