اسلام آباد( پاکستان پوائنٹ نیوز11۔جون2018ء ) عدالت نے موبائل کمپنیاں تے ایف بی آر ولوں لایا گیا ٹیکس معطل کر دتا۔موبائل فون کارڈز اُتے لائے گئے ٹیکس بارے سپریم کورٹ لاہور رجسٹری وچ کیس دی سنوائی ہوئی۔ میڈیا رپورٹس مطابق چیف جسٹس پاکستان جسٹس ثاقب نثار دی سربراہی وچ تن رکنی بنچ نے سپریم کورٹ لاہور رجسٹری وچ موبائل فون کارڈز اُتے ٹیکس کٹوتی خلاف آپ نوٹس کیس دی سنوائی کیتی۔
سپریم کورٹ نے موبائل کارڈز اُتے سروس چارجز ود ہولڈنگ ٹیکس تے ایکسائز ڈیوٹی نوں معطل کر دتا اے۔ سپریم کورٹ نے آکھیا کہ ایتھے لوکاں توں لُٹ ماری کیتی جا رہی اے۔ جسٹس اعجاز الاحسن دا کہنا سی کہ ریڑھی والے کولوں کیویں ٹیکس لِتا جا سکدا اے؟عدالت نے آکھیا کہ جس دا موبائل متھی حد توں ودھ ورتیا جاندا اوہدے کولوں ٹیکس لیا جائے۔ اک بندہ ٹیکس وچ ای نہیں آؤندا تے فیر اوہدے کولوں ٹیکس کیویں لیا جا سکدا اے؟چیف جسٹس نے ریمارکس دتے کہ ٹیکس دین والے تے نہ دین والے وچکار فرق واضح نہ کرنا امتیازی سلوک اے۔
آئین دے تحت امتیازی پالیسی نوں کالعدم قرار دتا جا سکدا اے۔ 10رُپئے دا کارڈ لوڈ کرن اُتے 38..64پیسے لئے جاندے نیں جو غیر قانونی نیں۔ کیس دی سنوائی دے موقعے اُتے چیئرمین ایف بی آر وی عدالت وچ پیش ہوئے۔ ایس موقعے تے جسٹس اعجاز الاحسن نے سوال کیتا کہ کیہ جو بندہ ٹیکس نیٹ وچ نہیں آؤندا اوہدے کولوں ٹیکس کیویں لیا جا سکدا اے؟جیہدے اُتے چیئرمین ایف بی آر نے دسیا کہ موبائل کالز اُتے سروسز چارجز دی کٹوتی کمپنیاں دا ذاتی عمل اے۔
چیئرمین ایف بی آر نے دسیا کہ 130ملین بندے موبائل فون ورتدے نیں جدکہ ملک بھر وچ ٹیکس دین والے بندیاں دی مجموعی گنتی 5فیصد اے۔ ایہدے اُتے چیف جسٹس ثاقب نثار نے پُچھیا کہ کیہ 5فیصد لوکاں توں ٹیکس لین لئی 130ملین اُتے موبائل ٹیکس لاگو ہو سکدا اے؟سپریم کورٹ نے موبائل کارڈز اُتے سروس چارجز ود ہولڈنگ ٹیکس تے ایکسائز ڈیوٹی نوں معطل کردے ہوئے آکھیا کہ موبائل فون کارڈز اُتے ٹیکس وصولی بارے اک جامع پالیسی بنائی جائے۔سپریم کورٹ نے حکم دتا کہ ایس فیصلے اُتے عملدرآمد پرسوں رات 12وجے دے بعد کیتا جائے گا۔
