چودھری نثار دا (ن) لیگ دے ٹکٹ اُتے الیکشن نہ لڑن دا اعلان

عورت راج دے مخالف نے اج اپنی دھی پارٹی اُتے مسلط کر دتی، میں مونہ کھولیا تے شریف فیملی کیتے مونہہ وکھان دے قابل نہیں رہوے گی: میڈیا نال گل بات

چودھری نثار دا (ن) لیگ دے ٹکٹ اُتے الیکشن نہ لڑن دا اعلان
عورت راج دے مخالف نے اج اپنی دھی پارٹی اُتے مسلط کر دتی، میں مونہ کھولیا تے شریف فیملی کیتے مونہہ وکھان دے قابل نہیں رہوے گی: میڈیا نال گل بات

اسلام آباد( پاکستان پوائنٹ نیوز11۔جون2018ء ) پاکستان مسلم لیگ(ن) دے ناراض رہنما و سابق وزیر داخلا چودھری نثار علی خان نے مسلم لیگ (ن) دے ٹکٹ اُتے الیکشن نہ لڑن دا علان کر دتا اے۔ چودھری نثار نے آزاد حیثیت وچ الیکشن لڑن دا اعلان کردے ہوئے آکھیا کہ عورت راج دے مخالف نے اج اپنی دھی پارٹی اُتے مسلط کر دتی، میں مونہ کھولیا تے شریف فیملی کیتے مونہہ وکھان دے قابل نہیں رہوے گی۔

میڈیا رپورٹ مطابق چودھری نثار نے قومی اسمبلی دے حلقہ 59 راولپنڈی، صوبائی اسمبلی دے حلقے پی پی پی 10تے 12توں کاغذات نامزدگی جمع کروائے نیں۔ اوہناں نے اج میڈیا نال گل بات کردے ہوئے آکھیا کہ پارٹی نے سیاسی یتیماں نوں ٹکٹ دے دتے نیں۔ میں مونہ کھولیا تے شریف کیتے مونہ وکھان دے قابل نہیں رہن گے۔ اوہناں نے سابق وزیر اعظم نواز شریف نوں تنقید دا نشانہ بناندے ہوئے آکھیا کہ عورت راج دے مخالف نے اج اپنی پارٹی اُتے دھی مسلط کر دتی۔

چیتے رہوے کہ پاناما کیس وچ نواز شریف دی نااہلی مگروں مسلم لیگ (ن) دی سیاست دا کالا دور شروع ہویا۔ مسلم لیگ (ن) دی ساکھ اودوں خطرے وچ پئی جدوں پارٹی دے قائد نواز شریف نے عدلیہ، نیب تے پاک فوج سنے ملکی اداریاں نوں تنقید دا نشانہ بنانا شروع کیتا۔ انج دے ماحول وچ پارٹی دے سینئر رہنماواں نے وی نواز شریف توں پچھانہ ہٹن دا فیصلا کیتا۔ ایس ساری صورتحال وچ چودھری نثار علی خان پہلے تے چُپ رہے پر فیر اوہناں نے وی میڈیا کانفرنس، نیوز کانفرنس تے پرچا کاراں نال گل بات دوران پارٹی پالیسیاں دی مخالف کیتی۔

معاملا اودوں خراب ہویا جدوں نواز شریف تے چودھری نثار علی خان وچ دوریاں ودھیاں تے دوریاں دا ذمے وار مریم نواز دی پارٹی پالیسی تے نویں حکمت عملی نوں قرار دتا گیا۔کُجھ دن پہلاں اختلافات اودوں ودھدے نظر آئے جدوں نواز شریف مگروں شہباز شریف نے راجن پورے دے دورے دے موقعے اُتے نجی ٹی وی چینل نال گل بات کردے ہوئے آکھیا کہ ایہ 1988دے زمانے دی گل اے۔

چودھری نثار میرے مخالف سن۔ چودھری نثار نواز شریف نوں میریاں شکایتاں کردے سن۔ چودھری نثار نال میرا تعلق نواز شریف راہیں ہویا۔ چودھری نثار نال کُجھ چِر ایس طرحاں دا گزریا فیر اوہ میرے دوست بن گئے۔ شہباز شریف دے بیان دے ردعمل وچ چودھری نثار علی خان نے آکھیا کہ شہباز شریف گھمبیر تے مشکل صورتحال توں نکلن اُتے طاقت خرچ کرن۔ بطور پارٹی صدر شہباز شریف وی ایہدے مداوے لئی کُجھ نہیں کر پا رہے ۔

اوہناں نے آکھیا کہ حیرت اے شہباز شریف نوں بچپنے تے سنجیدہ عمل وچ فرق دا احساس نہیں۔ بچپنا اوہ عمل جو اوہناں دی پارٹی قیادت ایس ویلے روا رکھے ہوئے اے۔ اوہناں نے آکھیا کہ شہباز شریف نوں صلاح اے کہ اوہ 30سال پرانیاں گلاں دا ذکر نہ کرن۔ایس ساری صورتحال مگروں ہن چودھری نثار علی خان نے آزاد حیثیت نال الیکشن لڑن دا اعلان کر دتا اے۔