لاہور( پاکستان پوائنٹ نیوز08۔جون2018ء ) مشہور پرچا کار مبشر لقمان دا اپنے پروگرام دوران کہنا سی کہ مینوں سکول دے کُجھ بالاں نے خط لکھے نیں کہ اسیں اپنی جیب خرچ وچوں کالا باغ ڈیم لئی اک اک ہزار رُپئے دین نوں تیار آں۔ تے بال جس کم پچھے پے جان ، اوہ کم فیر کر کے رہندے نیں، جیویں شوکت خانم کینسر ہسپتال دے خاب نوں حقیقت وچ بدلن لئی سکول دے بالاں نے اہم کردار ادا کیتا سی۔
مبشر لقمان دا ہور کہنا سی کہ لوک مینوں پیسہ گھلن لگ گئے نیں پر میری چیف جسٹس میاں ثاقب نثار توں درخاست اے کہ اوہ اک اکاؤنٹ کھلوان جیہدے وچ کالا باغ ڈیم لئی جو پیسے دینا چاہندا دے سکے۔ ایس ملک دی 22کروڑ آبادی اے، جے سبھ اک اک ہزار روپیہ دیوے تے فیر سانوں کسے آئی ایم ایف یاں ورلڈ بنک دی ضرورت نہیں ہوئے گی۔ پاکستان وچ کسے وی قسم دا ڈیم بنان لئی پاکستانی لوکائی اگے اگے اے۔ سکول دے بالاں دا کہنا اے کہ اوہ کالا باغ ڈیم لئی آپ وی پیسے اکٹھے کرن گے تے اپنے رشتے داراں تے دوستاں توں وی جمع کرن گے۔ دوجے پاسے سوشل میڈیا اُتے وی کالا باغ ڈیم دے حوالے نال اک مہم جاری اے۔ پاکستانی سوشل میڈیا ورتیندڑاں دا کہنا اے کہ پاکستان اندر ہر صورت وچ کالا باغ ڈیم بننا چاہیدا۔
