اسلام آباد( پاکستان پوائنٹ نیوز08۔جون2018ء ) شریف خاندان خلاف ایون فیلڈ ریفرنس وچ ڈپٹی پراسیکیوٹر جنرل نیب نے حتمی دلائل دوران آکھیا اے کہ ثبوتاں توں ثابت کر دتا کہ لندن فلیٹس دے مالک نواز شریف نیں، قطری والا دفاع وی اوہناں دا اپنا اے جیہنوں غلط ثابت کر چکے آں۔ جمعے نوں احتساب عدالت دے جج محمد بشیر نے نیب ولوں دائر ریفرنس دی سنوائی کیتی۔
نامزد ملزم سابق وزیراعظم نواز شریف عدالت ساہمنے پیش ہوئے۔ سنوائی دے شروع اُتے بجلی بند ہون کارن وقفہ کیتا گیا جیہدے مگروں نواز شریف عدالت توں واپس چلے گئے۔ ڈپٹی پراسیکیوٹر جنرل نیب سردار مظفر عباسی نے لگاتار چوتھے دیہاڑے حتمی دلائل دوران آکھیا کہ ریکارڈ نہیں کہ اختر ریاض راجا یاں واجد ضیاء دی نواز شریف نال دشمنی ہوئے ۔ ڈپٹی پراسیکیوٹر نیب نے آکھیا کہ نواز شریف دے لندن فلیٹس دے اصل مالک ہون دے سِدھے ثبوت پیش کر دتے، قطری والا دفاع وی اوہناں دا اپنا اے جیہنوں اسیں غلط ثابت کر چکے آں، ایہ جائیداد اوہناں دی اے اسیں ثبوتاں توں ثابت کیتا۔
سردار مظفر عباسی نے آکھیا کہ ثابت کر چکے آں کہ پراپرٹی 1993توں اوہناں دی اے، ایہ لندن فلیٹ دی ملکیت توں انکاری وی نہیں، فرد جرم مطابق اسیں اپنی ذمے واری پوری کیتی اے، گل اوہناں دی سی کہ اوہ ثبوت دی وضاحت کردے پر اوہ کوئی ثبوب نہ دے سکے۔ سردار مظفر عباسی نے آکھیا کہ مریم نواز نے ٹرسٹ ڈیڈ اصل دس کے جے آئی ٹی وچ دتی جدکہ ریڈلے دی رپورٹ وچ اوہنوں اپنے ولوں بنائی (خودساختہ) تے نقلی قرار دتا گیا۔ ملزماں نے عدالت وچ کوئی ٹرسٹ ڈیڈ نہیں دتی۔ ڈپٹی پراسیکیوٹر نے آکھیا کہ نواز شریف نے بطور وزیر اعظم قوم نال خطاب وچ آکھیا سی کہ کرپشن نال جائیداد بنان والا جائیداد اپنے ناں اُتے نہیں رکھدا تے اوہناں دا ایہ بیان ثبوت دے طور اُتے استغاثہ ولوں عدالت وچ پیش کیتا گیا۔
