اسلام آباد( پاکستان پوائنٹ نیوز02۔جون2018ء ) نجی ٹی وی چینل دے پروگرام وچ گل بات کردے ہوئے مشہور پرچا کار حامد میر نے آکھیا کہ پی ٹی آئی غلطیاں کر رہی اے ، اوہ اپنیاں ایہناں غلطیاں توں سکھے گی۔ پی ٹی آئی لئی اک ہور وی امتحان باقی اے جو کُجھ دناں بعد آئے گا اوہ ایہ اے کہ جدوں پی ٹی آئی عام انتخابات لئی امیدواراں نوں ٹکٹ دے دیوے گی تے ایہدے نال بہت سارے حلقیاں وچ آپسی لڑائیاں شروع ہو جان گیاں۔
حامد میر دا کہنا سی کہ مینوں اطلاع ملی اے کہ پی ٹی آئی نے کراچی وچ قومی تے صوبائی اسمبلیاں دیاں سیٹاں اُتے کُجھ ٹکٹاں الاٹ کر دتیاں نیں جیہدے نال کراچی دی قیادت وچ بتھیرے مسئلے پیدا ہو گئے نیں۔ ہن پی ٹی آئی وچ ذوالفقار کھوسہ تے دوست محمد کھوسہ وی رلتی ہو گئے نیں جیہدے اُتے کئی پارٹی رہنماواں نوں اعتراض اے۔اوہناں نے آکھیا کہ پارٹی اندر لوک آکھ رہے نیں کہ فاروق بندیال نوں پارٹی وچ رلت کیتا تے شبنم کیس کُھل گیا پر ہن ذوالفقار کھوسہ وغیرہ نوں پارٹی وچ رلت کر لیا، ہن سپنا کیس کُھل جائے گا۔
حامد میر دا کہنا سی کہ پی ٹی آئی نوں بہت سوچ سمجھ کے اگانہ ٹُرنا چاہیدا۔ ہو سکدا کہ آؤندے دناں نوں مسلم لیگ (ن) بارے کُجھ ایس طرحاں دے عدالتی فیصلے آ جان جیہدے نال اوتھے وی توڑ جوڑ دا عمل شروع ہو جائے، ایس صورت وچ پی ٹی آئی نوں ہور ریلیف مل جائے گا۔اوہناں دا کہنا سی کہ سوشل میڈیا دے حوالے نال سانوں اک پہلو بارے غور کرنا چاہیدا جے سوشل میڈیا اُتے کسے گل نوں لے کے پی ٹی آئی اُتے تنقید ہوندی اے تے اوہ ایہنوں ٹھیک کرن دی کوشش کردے نیں حالانکہ اودوں تیکر بہت دیر ہوگئی ہوندی اے۔ پر کُجھ نہ کُجھ کرن دی کوشش ضرور کردے نیں، ایہ پی ٹی آئی دا مثبت پہلو اے پر ایہدا منفی پہلو ایہ اے کہ فیصلا کرن توں پہلاں سوچ لیا جائے تے ایس طرحاں دی اُلجھن دا ساہمنا نہ کرنا پئے۔
