لاہور( پاکستان پوائنٹ نیوز02۔جون2018ء ) مسلم لیگ (ن) نے نگران وزیر اعلا لئی 4ناں تجویز کر دتے۔ میڈیا رپورٹس مطابق مسلم لیگ (ن) ولوں سابق ڈی جی آئی بی آفتاب سلطان، بیورو کریٹ طارق ڈوگر، سابق سربراہ پاک بحریہ ذکا اللہ تے جسٹس (ر) سائرہ علی دے ناں نگران وزیر اعلا پنجاب لئی تجویز کیتے گئے۔ وسیلیاں نے دسیا کہ شہباز شریف نے نگران وزیر اعلا پنجاب دے ناواں بارے پارٹی قائد نال ملاقات کیتی۔
ملاقات دوران نواز شریف تے شہباز شریف وچ ایہناں چار ناواں نوں تجویز کرن اُتے اتفاق ہویا۔چیتے رہوے کہ نگران وزیر اعلا پنجاب دا معاملا لما ہوندا جا رہیا اے۔ پاکستان تحریک انصاف دا نگران وزیر اعلا دے ناں اُتے یوٹرن دا سلسلا جاری اے۔پچھلے دیہاڑے میڈیا رپورٹس مطابق تحریک انصاف دے ترجمان فواد چودھری نے آکھیا کہ اج دتے گئے 3ناواں اُتے ایکا ہوجائے گا۔
ایاز میر، حسن عسکری تے یعقوب اظہار دا ناں فائنل اے۔ اوہناں نے آکھیا کہ پارٹی وچ رابطیاں دی کمی اے۔ کوآڈینیشن وچ بہتری آنی چاہیدی۔ اوہناں نے اک سوال دے جواب وچ آکھیا کہ نگران وزیر اعلا دے ناں ساہمنے آ رہے نیں پر ایہدے وچ اینی پریشانی وال گل نہیں اے۔ ناصر درانی نے معذرت کر لی، ناصر کھوسہ دا ناں واپس لے لیا گیا ۔ پر فائنل کرنا محمود الرشید دا کم اے ۔ اوہناں دا کہنا سی کہ مینوں جو پارٹی لائن دیوے گی میں تے اوہدے اُتے گلاں کراں گا۔
