چودھری نثار نے چُپ کر کے (ن) لیگ نال گیم کھیڈ دتی،حامد میر دا دلچسپ انکشاف

چودھری نثار نے چُپ کر کے (ن) لیگ نال گیم کھیڈ دتی،حامد میر دا دلچسپ انکشاف

اسلام آباد( پاکستان پوائنٹ نیوز02۔جون2018ء ) نجی ٹی وی چینل دے پروگرام وچ گل بات کردے ہوئے مشہور پرچا کار حامد میر نے آکھیا کہ پی ٹی آئی اک نویں جماعت اے۔ پی ٹی آئی بے شک بنی 1995،1996وچ سی پر پی ٹی آئی دی سیاسی اُڈان 2011وچ سبھ نے ویکھی، جیہدا مطلب اے کہ پی ٹی آئی دے سیاست وچ ایس لحاظ نال چھ توں ست سال بندے نیں جدکہ ایہدے مقابلے وچ مسلم لیگ (ن) پُرانی جماعت اے۔

مسلم لیگ (ن) وچ اک بندہ اے جیہدا ناں چودھری نثار علی خان اے۔ اوس بندے نے پبلک وچ گل بات کردتی اے، اوہ بندہ پہلے اپنے بیان وچ نواز شریف نوں نشانہ بناندا سی پر ہن اوہنے شہباز شریف بارے وی بیان دینے شروع کر دتے نیں تے حیرانگی دی گل ایہ اے کہ مسلم لیگ (ن) دی قیادت ایس معاملے اُتے ٹس توں مس نہیں ہو رہی۔ چودھری نثار علی خان اجے پارٹی اندر نیں، آخری دناں وچ قومی اسمبلی دا جو اجلاس ہویا اے، اوہدے وچ ویکھیا گیا کہ پارٹی رہنما واں دیاں چودھری نثار علی خان نال ہس ہس کے گلاں ہو رہیاں نیں۔

ایم پی ایز اوہناں نوں گھیرا پائی بیٹھے نیں، چودھری نثار علی خان ایسے طریقے نال پارٹی اندر ان تے ایکٹو نیں۔ مسلم لیگ(ن) ایہ وی تے ویکھے۔ اسیں پی ٹی آئی اُتے تنقید کردے آں تے جائز تنقید کر رہے آں، پر ایہ جو اینی پرانی سیاسی جماعت اے اوہدے اندر چودھری نثار علی خان دے معاملے اُتے ہن تیکر ایہ لوک کوئی فیصلا نہیں کر سکے کہ چودھری نثار علی خان نوں پارٹی وچ رکھنا یاں نہیں ۔

چودھری نثار علی خان نے وی اپنے آپ نوں امتحان وچ پایا ہویا اے ۔ اوہ وی پارٹی نوں جانکے نہیں چھڈ رہے۔ حامد میر نے آکھیا کہ وزیر اعظم شاہد خاقان عباسی توں لے کے جونیئر منسٹر تک، اسیں قومی اسمبلی اندر ویکھیا کہ چودھری نثار نوں سلام کر رہے نیں، جوکہ بُری گل نہیں اے۔ پر اک کنفیوژن پیدا کر دتی گئی اے، اک بندہ جو نواز شریف بارے بول رہیا اے تے آکھ رہیا اے کہ نواز شریف نے پارٹی پالیسی نوں تباہ کر دتااے، جو ہُن نواز شریف نال نظر تیکر نہیں آؤندا اوہ وی اجے تیکر پارٹی اندر بیٹھا ہویا اے۔

کیہ پی ٹی آئی وچ کوئی اجیہا پنچھی اے جو عمران خان نوں چیلنج کر کے پارٹی وچ رہ سکدا اے؟پی ٹی آئی دیاں غلطیاں اپنی تھاں پر انج کدی نہیں ہویا۔ ایس گل اُتے مسلم لیگ(ن) دی وکٹ پی ٹی آئی ساہمنے کمزور اے کیونکہ مسلم لیگ (ن) وچ نواز شریف نوں چیلنج کرن والے اجے تیکر پارٹی اندر موجود نیں۔ پی ٹی آئی تے مسلم لیگ (ن) وچ ایہو اک واضح فرق اے۔