اسلام آباد( پاکستان پوائنٹ نیوز01۔جون2018ء ) مسلم لیگ (ن) نے پارٹی دے سینئر رہنما چودھری نثار علی خان نوں ٹکٹ نہ دین دا حتمی فیصلا کر لیا اے۔ رپورٹ مطابق مسلم لیگ (ن) نے چودھری نثار علی خان نوں الیکشن 2018وچ پارٹی ٹکٹ نہ دین دا حتمی فیصلا کیتا اے جیہدے مگروں ہن چودھری نثار علی خان دے پی ٹی آئی وچ رلتی ہون دا امکان ودھ گیا اے۔ قومی اخبار وچ چھپن والی اک رپورٹ وچ دسیا گیا کہ چودھری نثار علی خان دا اج پی ٹی آئی وچ رلتی ہون دا امکان اے۔
وسیلیاں توں پتا لگا اے کہ نااہل وزیراعظم نواز شریف نے اپنے بھرا شہباز شریف نوں ایس گل اُتے راضی کر لیا اے کہ چودھری نثار علی خان نوں پارٹی ٹکٹ نہ دین اُتے پارٹی نوں نقصان نہیں ہوئے گا۔ چیتے رہوے کہ بدھ دے دیہاڑے وزیر اعلا پنجاب شہباز شریف نے راجن پورے دے دورے دے موقعے اُتے نجی ٹی وی چینل نال گل بات کردے ہوئے آکھیا سی کہ ایہ 1988دے زمانے دی گل اے۔
چودھری نثار میرے مخالف سن۔ چودھری نثار نواز شریف نوں میریاں شکایتاں کردے سن۔ چودھری نثار نال میرا تعلق نواز شریف راہیں ہویا۔ چودھری نثار نال کُجھ چِر ایس طرحاں دا گزریا فیر اوہ میرے دوست بن گئے۔ شہباز شریف دے بیان دے ردعمل وچ چودھری نثار علی خان نے پچھلے دیہاڑے آکھیا کہ شہباز شریف گھمبیر تے مشکل صورتحال توں نکلن اُتے طاقت خرچ کرن۔ بطور پارٹی صدر شہباز شریف وی ایہدے مداوے لئی کُجھ نہیں کر پا رہے ۔ اوہناں نے آکھیا کہ حیرت اے شہباز شریف نوں بچپنے تے سنجیدہ عمل وچ فرق دا احساس نہیں۔ بچپنا اوہ عمل جو اوہناں دی پارٹی قیادت ایس ویلے روا رکھے ہوئے اے۔ اوہناں نے آکھیا کہ شہباز شریف نوں صلاح اے کہ اوہ 30سال پرانیاں گلاں دا ذکر نہ کرن۔
