اسلام آباد( پاکستان پوائنٹ نیوز01۔جون2018ء ) سپریم کورٹ نے سابق وفاقی وزیر خواجا آصف دی زندگی بھر لئی نااہلی دے فیصلے نوں کالعدم قرار دے دتا اے۔ میڈیا رپورٹس مطابق جسٹس عمر عطا بندیال دی سربراہی وچ تن رکنی بنچ نے خواجا آصف دی زندگی بھر لئی نااہلی دے فیصلے دی سنوائی کیتی۔ سنوائی دوران سپریم کورٹ نے خواجا آصف دی زندگی بھر لئی نااہلی نوں کالعدم قرار دے دتا۔
اپیل اُتے فیصلا جسٹس عمر عطا بندیال نے سُنایا۔ کیس دا تفصیلی فیصلا کُجھ دیر وچ جاری کیتا جائے گا۔ زندگی بھر لئی نااہلی کالعدم قرار ہون مگروں خواجا آصف الیکشن 2018وچ حصہ لے سکن گے۔چیتے رہوے کہ پچھلے دیہاڑے سپریم کورٹ وچ خواجا آصف دی نااہلی خلاف اپیل دی سنوائی ہوئی۔ خواجا آصف نے پی ٹی آئی رہنما عثمان ڈار دی درخاست اُتے اسلام ہائی کورٹ دا فیصلا سپریم کورٹ وچ چیلنج کیتا ہویا سی۔
سپریم کورٹ وچ خواجا آصف نااہلی کیس دی سنوائی دوران پی ٹی آئی رہنما عثمان ڈار دے وکیل سکندر بشیر نے دلائل دیندے ہوئے آکھیا کہ خواجا آصف دی تنخاہ دی سالہوار(سالانہ) آمدن 20لکھ درہم توں ودھ بندی سی۔ خواجا آصف نے بطور رکن قومی اسمبلی اپنی تنخاہ ظاہر کیتی۔ خواجا آصف نے کاغذات نامزدگی وچ ملکی تنخاہ نوں ظاہر نہیں کیتا۔ وکیل عثمان ڈار نے ہور دلائل دتے کہ کاغذات نامزدگی وچ باہرلے ملک دے اثاثے تے ٹیکس ظاہر کرن دا فارم موجود اے۔کیس دی سنوائی مگروں عدالت نے کل فیصلا محفوظ کر لیا، جو اج سُنا دتا گیا اے۔
