اسلام آباد( پاکستان پوائنٹ نیوز01۔جون2018ء ) سپریم کورٹ نے سابق وفاقی وزیر خواجا آصف دی زندگی بھر لئی نااہلی دے فیصلے نوں کالعدم قرار دے دتا۔ سپریم کورٹ دے فیصلے مگروں لیگی کارکناں تے رہنماواں وچ خشی دی لہر دوڑ پئی۔ مسلم لیگ (ن) دی رہنما مریم نواز نے مائیکرو بلاگنگ ویب سائٹ ٹویٹر اُتے اپنے پیغام وچ خواجا آصف نوں مبارکباد دیندے ہوئے آکھیا کہ بہت بہت مبارک ہوئے، ظلم و انصافی نوں اک دن مِٹنا ای پیندا اے۔
ایس موقعے تے مسلم لیگ (ن) دے صدر شہباز شریف نے وی اپنے ٹویٹر پیغام وچ خواجا آصف نوں مبارک باد دیندے ہوئے آکھیا کہ الحمد اللہ۔۔بہت مبارک خواجا صاحب!تہاڈی سیالکوٹ نال تے سیالکوٹ دی تہاڈے نال محبت دا عملی مظاہرہ اسیں کئی وار ویکھ چکے آں۔شہباز شریف نے اپنے ٹویٹر پیغام وچ خواجا آصف نوں ہدایت کیتی کہ تُسیں ہن الیکشن دی تیاری پھڑو۔
چیتے رہوے کہ اج سپریم کورٹ نے سابق وفاقی وزیر خواجا آصف دی زندگی بھر لئی نااہلی دے فیصلے نوں کالعدم قرار دے دتا اے۔ میڈیا رپورٹس مطابق جسٹس عمر عطا بندیال دی سربراہی وچ تن رکنی بنچ نے خواجا آصف دی زندگی بھر لئی نااہلی دے فیصلے دی سنوائی کیتی۔ سنوائی دوران سپریم کورٹ نے خواجا آصف دی زندگی بھر لئی نااہلی نوں کالعدم قرار دتا۔ اپیل اُتے فیصلا جسٹس عمر عطا بندیال نے سُنایا۔ کیس دا تفصیلی فیصلا کُجھ دیر وچ جاری کیتا جائے گا۔ زندگی بھر لئی نااہلی کالعدم قرار ہون مگروں خواجا آصف الیکشن 2018وچ حصہ لے سکن گے۔
