واشنگٹن (پاکستان پوائنٹ نیوز۔26ستمبر 2016) سیکرٹری خارجا اعزاز چودھری نے کہیا اے کہ ہندستانی وزیراعظم نریندر مودی دے حالیا بیانات کِسے دوجے ملک دے داخلی معاملات وچ مداخلت تے اقوام متحدا دے عالمی چارٹرز دی خلاف ورزی نیں جد کہ امریکا وچ تعینات پاکستانی سفیر جلیل عباس جیلانی دا وی ایہ خیال اے کہ نریندر مودی دے بیانات ایس گل دی عکاسی کردے نیں ہندستان کشمیر دی صورتحال اُتے گھبراہٹ دا شکار اے۔
کیرالا وچ ہندستانی وزیراعظم دے خطاب دے حوالے توں اعزاز چودھری تے جلیل عباس جیلانی نے کہیا کہ اقوام متحدا دیاں کئی قرار داداں وچ پاکستان نُوں مسئلا کشمیر وچ فریق منیا گیا اے تے ہندستان آپ وی ایہنوں مندا اے پر انڈیا دے کول پاکستان دے معاملات وچ دخل اندازی کرن دا کوئی جواز موجود نہیں۔ اعزاز چودھری دا کہنا سی کہ ایہ بدقسمتی دی گل اے کہ ہندستانی قیادت مسلسل اشتعال انگیز بیانات تے بے بنیاد الزامات راہیں پاکستان نُوں بدنام کرن اُتے تلی ہوئی اے۔
اوہناں دا کہنا سی کہ اعلا سیاسی قیادت ولوں ایس طرحاں دا غیر ذمے وارانا رویا اختیار کرنا انتہائی افسوس دی گل اے۔ سیکرٹری خارجا نے کہیا کہ ایہ گل واضح ہو چکی اے کہ ہندستان کشمیر وچ انڈین فورساں ولوں ڈھائے جان والے مظالم توں دنیاں دی توجا ہٹان دی کوشش کر رہیا اے۔ پاکستانی سفیر جلیل عباس جیلانی نے کہیا کہ پاکستان خلاف بیانات دے کے ہندستانی آگو اپنی فوج ولوں کشمیریاں دے نال روا رکھے جان والے ظلم و زیادتیاں اُتے پردا پان دی کوشش کر رہے نیں۔
اوہناں نے کہیا کہ ’اسیں ایہناں بیاناں نُوں رد کردے آں‘ ایہ انتہائی غیر ذمے وارانا طرز عمل اے جد کہ ایہناں بیاناں وچ حقایق نُوں توڑ مروڑ کے پیش کیتا گیا۔ جلیل عباس جیلانی نے ہور کہیا کہ اپنی شرمندگی نُوں لکان دی بوکھلاہٹ وچ ہندستانی آگو سفارتی آداب وی بھُل گئے۔ اوہناں نے کہیا کہ اسی طرحاں دے بیانات راہیں اوہ ہندستان دے زیر انتظام کشمیر وچ ہون والی دہشتگردی تے انسانیت سوز مظالم اُتے پردا نہیں پا سکدے۔
اقوام متحدا دی جنرل اسمبلی دے اجلاس دے موقع اُتے عالمی آگوواں نال ملاقات وچ پاکستانی سفارتکاراں نے خبردا کیتا کہ جے ہندوستان ایہ سوچ رہیا اے کہ اوہ پاکستان نُوں عالمی سطح اُتے کلا کرن وچ کامیاب ہو جاوے گا تے ایہ اوہدی غلط فہمی اے۔ اوہناں نے ہندستان نُوں یاد دہانی کروائی کہ جنوبی ایشیا وچ نواں اتحاد قایم ہو رہیا اے تے کل دے دشمن اج دوست بن رہے نیں۔
پاکستانی سفارتکاراں نے کہیا کہ کشمیر دا مسئلا ذمے وارانا تے حقیقی رد عمل دا متقاضی اے پر بدقسمتی نال ہندستان ایس معاملے اُتے انتہائی غیر ذمے وارانا طرز عمل اپنایا ہویا اے۔ اوہناں دا کہنا سی کہ ہندستان غلط مثال قایم کر رہیا اے جہدے نال ساریاں نُوں نقصان ہووے گا تے جے اوہ ایسے راہ اُتے چلدا رہیا تے پاکستان دی بجائے اِک دن اوہ آپ کلا ہو جاوے گا۔
سفارتکاراں نے کہیا کہ پاکستان نے خطے وچ نویں دوست بنا لئے نیں جہناں وچ روس وی شامل اے جد کہ پرانے دوست ترکی تے وسطی ایشیائی ریاستاں وی ایہدی حمایت کر رہیاں نیں۔ اِک سینئر سفارتکار نے وضاحت کردیاں ہویاں کہیا کہ ایہدا مطلب ایہ نہیں کہ پاکستان دے امریکا دے نال قریبی تعلقات نہیں سگوں پاکستان تے امریکا قریبی اتحادی نیں تے مستقبل وچ وی رہن گے۔ سفارتکارں نے ایس تاثر نُوں رد کر کیتا کہ جنوبی ایشیا دی موجودا صورتحال پاک ہندستان جنگ دا پیش خیما ثابت ہو سکدی اے۔ اِک سفارتکار نے کہیا کہ ”کوئی جنگ نہیں ہووے گی‘ اسیں جنگ شروع کرن دا کوئی ارادا نہیں رکھدے تے ہندوستان نُوں اس گل دا احساس اے کہ ایس موقع اُتے جے جنگ ہوئی تے اوہدی معیشت تباہ ہو جاوے گی۔
