نویں دِلی (پاکستان پوائنٹ نیوز۔26ستمبر 2016) ہندستان وچ تعینات پاکستانی ہائی کمشنر عبدالباسط نے کہیا اے کہ پاکستان مستقبل وچ انڈیا نال مثبت تے تعمیری تعلقات لئی پرامید اے تے توقع کردا اے کہ دوہاں ملکاں دے آگو سنجیدگی تے پختگی دا مظاہرا کردیاں ہویاں موجودا بحران توں نکلن دی کوشش کرن گے۔ اخبار دی ٹیلی گراف نُوں دِتے گئے انٹرویو وچ عبدالباسط نے کہیا کہ جویں کہ ساڈے وزیراعظم نے اقوام متحدا وچ کہیا کہ پاکستان اپنے ایس عزم دا اعادا کردا اے کہ اوہ ہندستان نال معمول مطابق تے تعاون اُتے مبنی تعلقات چاہندا اے تے سارے مسئلیاں نُوں پرامن طریقے نال حل کرن دا خاہاں اے۔
عبدالباسط نے کہیا کہ ہندستان دی نیشنل انویسٹی گیشن ایجنسی ہُن وی اڑی واقعے دیاں تحقیقات کر رہی اے تاں جے ایہ پتا لایا جا سکے کہ حملا کویں ہویا جہدے وچ 18 ہندستانی فوجی ہلاک ہو گئے۔ اوہناں دا کہنا سی کہ ”ایہ میری تجویز اے کہ بغیر تحقیقات جلد بازی وچ الزامات لانا سود مند نہیں‘ ساریاں نے ویکھیا کہ پٹھان کوٹ واقع دے بعد اسیں کِس طرحاں تعاون کیتا‘ شیواں مثبت سمت ول گامزن سن تے جے اوہی جذبا برقرار رکھیا جاوے تے مینوں یقین اے کہ صورتحال نُوں ہور خراب ہون توں روکیا جا سکدا اے۔
پاکستانی ہائی کمشنر نے کہیا کہ میں اِک سفارتکار آں تے چاہندا آں کہ سفارتکاری دی جِت ہووے مینوں نہیں لگدا کہ دو پاسی سفارتکاری خستگی دا شکار ہو چکی اے۔ اوہناں دا ہور کہنا سی کہ پاکستان اپنی سرزمین ہندستان سنے دنیا دے کِسے وی حصے وچ دہشت تے تشدد کھلارن لئی استعمال نہ ہون دے عزم اُتے قایم اے۔ اوہناں نے کہیا کہ ساڈے تعلقات درست سمت وچ سن‘ میں بہت پر امید سی پر8 جولائی( جدوں حزب المجاہدین دے کمانڈر برہان وانی نُوں ہندستانی فورساں نے ہلاک کیتا ) نوں حالات بلکل بدل گئے تے ایہو اوہ موقع سی جدوں تسلسل ٹُٹیا۔
اوہناں نے کہیا کہ ایس تسلسل نُوں دُبارا توں شروع کرن لئی دوہاں ملکاں دے سفارتکاراں اُتے بھاری ذمے واری عاید ہوندی اے۔ پاکستانی ہائی کمشنر دا کہا سی کہ دِلی وچ رہ کے زندگی دے ہر شعبے نال تعلق رکھن والے لوکاں نال ملاقاتاں ہوئیاں تے مینوں ایتھے لوکاں وچ وی امن تے آپسی سمجھوتے دی خاہش وکھائی دِتی۔ عبدالباسط نے ایس گل دا اعتراف کیتا کہ اڑی حملے دے بعد دوہاں ملکاں وچ فوج دی تیاریاں دے آثار وکھائی دِتے پر اوہناں نے کہیا کہ ”مینوں نہیں لگدا کہ کوئی جنگ ہو ن جا رہی اے‘ مینوں ایس گل اُتے کامل یقین اے کہ پاکستان تے ہندستان نُوں ہیجان انگیزی توں کوئی فایدا حاصل نہیں ہووے گا‘ جنگ کِسے مسئلے دا حل نہیں سگوں ہور کئی مسئلیاں دی وجھا اے‘ اوہناں دا کہنا سی کہ میں سختی دے نال ایس گل اُتے زور دیندا آں کہ ساڈے جہڑے وی مسئلے نیں اوہناں نُوں پرامن طریقے نال حل ہوا چاہیدا اے۔
اوہناں نے کہیا کہ کجھ عرصے تک اِک دوجے نال گل نہ کرن دے متحمل تے ہو سکدے آں پر ساڈے کئی آپسی‘ علاقائی تے عالمی چیلنجز ایہو جہے نیں جو صرف مذاکرات راہیں ای حل ہو سکدے نیں۔ اوہناں دا کہنا سی کہ میں ایس حوالے توں کوششاں جاری رکھاں گا تے سانوں جنگی جنون نُوں غالب نہیں آن دینا چاہیدا اے۔ عبدالباسط نے کہیا کہ ایہو جہے لوک موجود نیں جہناں دے مفادات پاک ہندستان تعلقات ڈی ریل ہو نال وابستا نیں‘ جے تُسیں پٹھان کوٹ یاں اڑی واقع دی گل کردے او تے میں ایہ کہواں گا کہ دوویں ملک ایس گل اُتے متفق نیں کہ جو میکینزم اسیں اپنائے ہوئے نیں اوہناں وچ ایس طرحاں دے واقعات دے بعد پیدا ہون والی صورتحال نُوں برداشت کرن دی صلاحیت ہونی چاہیدی اے۔
