آزاد کشمیر(پاکستان پوائنٹ نیوز15۔مئی2018ء ) دریائے نیلم دُکھانت وچ بچ جان والے نوجوان دی آپ بیتی ساہمنے آ گئی۔ نوجوان دا کہنا سی کہ میں پُل وچکار کھلوتا سی، جدوں پُل ٹُٹا تے اک پتھر نال لٹک کے جان بچائی۔ پولیس مدد کرن دی بجائے آرمی دے آن دا دلاسہ دیندی رہی۔ تفصیل مطابق ایتوار دے دیہاڑے وادی نیلم وچ ہون والے حادثے نے حکومتی لاپرواہی تے انتظامی کماں دا راز کھول دتا۔
وسیلیاں مطابق پُل لمے چِر توں ٹُٹیا بھجیا ہویا سی پر ایہدے مگروں وی حکومت یاں شہری انتظامیہ و متعلقہ حکام ولوں کسے وی قسم دا کوئی کم نہ کیتا گیا۔ ایس موقعے تے حادثے وچ بچ جان والے نوجوان دی آپ بیتی ساہمنے آئی اے۔ بچ جان والے نوجوان دا کہنا سی کہ جدوں پُل ڈگیا میں اوس ویلے عین پُل دے وچکار سی۔ پل دیاں سائیڈاں اُتے موجود لوکاں نے پُل نوں پھڑ لیا،انج باہر کھلوتے لوکاں نے اوہناں دا ہتھ پھڑ کے اوہناں نوں باہر کھچ لیا جدکہ کئی لوک دریا وچ ای رہ گئے۔
نوجوان دا کہناسی کہ جیویں ای میں دریا وچ ڈگیا تے باقی لوک اگانہ لگے گئے جدکہ میں اوتھے موجود پتھر نوں پھڑ کے کھلوتا رہیا۔ نوجوان دا کہنا سی کہ حادثے مگروں مقامی بندیاں نے ساڈی بہت مدد کیتی، اوہناں مینوں آکھیا کہ میں پتھر نوں پھڑ کے بیٹھا رہواں ، جیہدی وجہ توں میری جان بچ گئی۔ نوجوان دا کہنا سی کہ پولیس 20منٹ لیٹ آئی۔ پولیس مدد دی بجائے آرمی دے آن دا دلاسہ دیندی رہی۔ نوجوان دا کہنا سی کہ اوہنوں مقامی بندیاں نے آپ دریا وچوں کڈھیا پر پولیس تماشہ ویکھدی رہی۔
