اسلام آباد(پاکستان پوائنٹ نیوز۔23ستمبر 2016) پاکستان نے مقبوضا کشمیر وچ بھارتی مظالم دی مذمت کردیاں ہویاں کہیا اے کہ طاقت دے بے جا استعمال نال کشمیریاں دے حق خُد ارادیت نُوں مِدھیا نہیں جا سکدا تے لوکائی دا ردِ عمل بھارتی موقف نُوں رد کردا اے۔ جمعے والے دِن ترجمان دفتر خارجا نفیس زکریا ولوں جاری بیان وچ کہیا گیا اے کہ وزیراعظم نواز شریف نے اقوام متحدا دی جنرل اسمبلی وچ کشمیریاں دی اواز بھرویں انداز وچ اُچی کیتی جو کشمیریاں دے جذبات دا عکاس اے جہدے جواب وچ بھارت نے وزیراعظم دے بیان اُتے تنقید کرن دا انتخاب کیتا پر کسے قسم دی تنقید تواریخی حقایق نُوں تبدیل نہیں کر سکدی‘ بھارت دی تنقید دا پاکستان جواب دین دا حق رکھدا اے تے پاکستان کشمیری لوکائی دے نال کھلوتا اے۔
اوہناں نے کہیا کہ 7 دہاکے لنگھن دے باوجود کشمیری لوکائی دا جذبا حریت گھٹ نہیں ہویا تے مقبوضا کشمیر دی لوکائی دا ردِ عمل بھارتی موقف نُوں رد کردا اے جد کہ عالمی برادری نے کشمیری لوکائی نُوں حق خُد ارادیت دین دا وعدا کیتا پر اوہنوں پورا نہیں کیتا۔ ترجمان دفتر خارجا نے ہور ہیا کہ برہان وانی دے قتل خلاف مقبوضا کشمیر وچ احتجاج شروع ہویا تے پرامن احتجاج نُوں طاقت راہیں مِدھن دی کوشش کیتی گئی‘ سینکڑاں بے گناہ کشمیریاں نُوں نابینا تے ہزاراں نُوں شدید زخمی کیتا گیا‘ طاقت دے استعمال دے باوجود کشمیریاں دے حوصلے پست نہیں ہوئے۔ ترجمان دفتر خارجا نے واضح کیتا کہ پاکستان کشمیری لوکائی دے نال کھلوتا اے‘ مقبوضا کشمیر دے تنازع اُتے چشم پوشی نہیں کیتی جا سکدی۔
