سانگھڑ، حسن ابدال(پاکستان پوائنٹ نیوز12۔ستمبر2016ء) سندھ تے پنجاب وچ ٹریفک دے دو مختلف حادثیاں وچ 12 بندے ہلاک تے کئی زخمی ہو گئے ، ہلاک تے زخمیاں ہون والیاں وچ سوانیاں تے بال وی شامل نیں۔ تفصیل دے مطابق سانگھڑ توں ٹنڈو آدم جان والی مسافر کوچ تے سجاول توں سانگھڑ آن والی مچھیریاں دی وین ٹنڈو آدم دے نیڑے شاہ بیگ مری دے مقام اُتے ٹکرا گئی، حادثے دے نتیجے وچ موقع اُتے ای 7 بندے ہلاک ہوئے گئے ۔
ہلاک ہون والیاں وچ زہرا، سومار، ھوا، عمر، جمن تے نصرین شامل سن جدکہ اک لاش دی شناخت نہیں ہوئی۔ حادثے دے بعد زخمیاں نوں فوری طور اُتے حیدر آباد منتقل کر دِتا گیا جہناں وچوں کئی زخمیاں دی حالت خطرے وچ دَسی گئی اے جدکہ کوچ دا ڈرائیور موقعے توں فرار ہون وچ کامیاب ہو گیا۔ دوجے پاسے حسن ابدال دے علاقے پور ہزارا روڈ اُتے پیش آن والے ٹریفک حادثے وچ ٹرک تے ویگن وچکار ٹکر دے نتیجے وچ 5 بندے ہلاک ہو گئے۔
جہناں وچ دو بال وی شامل نیں۔ حادثے دے زخمیاں نوں لاگے دے ہسپتال منتقل کر دِتا گیا۔ ویگن راولپنڈی توں ہری پور جا رہی سی۔ اک ہور حادثے وچ لکی شاہ صدر دے نیڑے انڈس ہائی وے اُتے بس دا ٹائر پھٹن پاروں بس اُلٹن دے نتیجے وچ چار سوانیاں تے دو بالاں سنے 12 بندے زخمی ہو گئے۔ جہناں نوں ڈاکٹری امداد لئی سیہون ہسپتال منتقل کیتا گیا۔ ریسکیو وسیلیاں دے مطابق بس کراچی توں لاڑکانہ جا رہی سی کہ راہ وچ حادثے دا شکار ہو گئی۔
