اسلام آباد(پاکستان پوائنٹ نیوز12۔ستمبر2016ء) پاکستان جدید ترین روسی جنگی جہاز ایس یو 35 مُل لین اُتے غور کر رہیا اے۔ تفصیل دے مطابق پاکستانی فوج ٹینک شکن ہتھیاراں تے ائر ڈیفنس نظام وچ بہتری لیان لئی روس توں ایس یو 35 جنگی جہاز مُل لووے گا۔ وسیلیاں دے مطابق پچھلے 15 مہینیاں دے دوران آرمی، ائر فورس تے نیوی دے سربراہواں نے ماسکو دے دورے کیتے نیں، ماسکو وچ پاکستانی سفیر قاضی خلیل اللہ نے میڈیا نوں دسیا اے کہ ائر چیف سہیل امان نے روسی حکام نال مذاکرات کیتے نیں جہدے نتیجے آن والے ویلے وچ چنگے نکلن گے۔
اسلام آباد دے سفارتی وسیلیاں دا کہنا اے کہ چالو ورھے روس تے پاکستان وچکار سانجھیاں فوجی مشقی وی ہون گیاں تے ایہناں فوجی مشقاں وچ دوویں ملکاں دے 2،2 سو اہلکارحصہ لین گے جو کہ چالو ورھے دے آخیر وچ ہون گیاں۔ماسکو وچ پاکستان دے سفیر قاضی خلیل اللہ نے میڈیا نوں دسیا کہ ایہ پہلا موقع اے کہ دوویں ملکاں دے فوجی اہلکار سانجھیاں فوجی مشقاں وچ حصہ لے رہے نیں، ایہناں مشقاں نوں فرینڈ شپ 2016 دا ناں دِتا گیا اے پر اوہناں نے ایہناں مشقاں دیاں تفصیلاں، تھاں ، ایہناں دی نوعیت یاں تاریخ دے حوالے نال کجھ نہیں دسیا۔ خلیل اللہ دے مطابق ایس پیشرفت نال دوویں ملکاں وچکار ودھدے ہوئے تعاون دی عکاسی ہوندی اے۔
