لاہور(پاکستان پوائنٹ نیوز13۔مارچ2018ء) مشہور پرچا کار مبشر لقمان دا کہنا اے کہ وزیر اعظم شاہد خاقان عباسی دے پُتر دے ہتھ وڈھ دینے چاہیدے۔ تفصیل مطابق مشہور پرچاکار مبشر لقمان دا کہنا اے کہ وزیر اعظم شاہد خاقان عباسی دے پُتر نے پارلیمنٹ وچ پاکستان تحریک انصاف دے رہنما اُتے حملا کیتا تے میرے خیال وچ وزیر اعظم دے پُتر نوں اسلامی قانون دے مطابق سزا دے کے اوہدے ہتھ وڈھ دینے چاہیدے تاں جے اک وار اوہناں حکمراناں نوں پتا چلے کہ ایہ کِنے وڈے بدمعاش نیں تے اوہناں دے ایس طرحاں دے کم ہن برداشت نہیں کیتے جان گے۔
مبشر لقمان دا کہنا سی کہ ایہ لوک چاہندے نیں کہ ملک وچ بھج نسل کھلر جائے تے لوک اک دوجے نال لڑن لگ پین۔چیتے رہوے کہ چار مارچ نوں ہون والے سینیٹ الیکشن مگروں کل سینیٹ دے چیئرمین تے ڈپٹی چیئرمین سینیٹ دے چناؤ دا دن سی۔ حکمران جماعت تے اپوزیشن ولوں جوڑ توڑ دا سلسلا وی جاری رہیا پر اپوزیشن دا پلڑا بھاری رہیا تے اپوزیشن دے نامزد امیدوار صادق سنجرانی 11ووٹاں توں جت گئے ۔چیئرمین سینیٹ دے چناؤ ویلے اپوزیشن دی غیر متوقع کامیابی نے ماحول نوں خراب کر دتا۔ ایس دوران مبینہ طور اُتے وزیراعظم دے پُتر نے تحریک انصاف دے رکن قومی اسمبلی حامد الحق خلیل اُتے تشدد کیتا۔
