اسلام آباد(پاکستان پوائنٹ نیوز23۔فروری2018ء) نیب عدالت وچ آئی ٹی ایکسپرٹ رابرٹ ریڈلے نے گواہی دتی اے کہ کیلبری فونٹ2005وچ مارکیٹ اندر موجود سی۔ تفصیل مطابق مریم نواز ولوں کیلبری فونٹ وچ جعلی دستاویزات عدالت وچ جمع کروان دے کیس دی سنوائی نیب عدالت وچ ہوئی۔ ایس دوران لندن توں ویڈیو لنک اُتے آئی ٹی ایکسپرٹ رابرٹ ریڈلے نے گواہ دے طور اُتے حصہ لیا۔
رابرٹ ریڈلے نے عدالت نوں دسیا کہ کیلبری فونٹ ونڈو وسٹا2005توں پہلاں دستیاب سی پر فونٹ عام لوکاں دی ورتوں وچ نہیں سی۔ رابرٹ ریڈلے نے دسیا کہ فونٹ دی عام ورتوں 2007مگروں شروع ہوئی۔ 2007وچ ونڈو وسٹا دا پورا ورژن عام لوکاں دی ورتوں لئی مارکیٹ وچ پیش کیتا گیا سی، اودوں ای پہلی وار کیلبری فونٹ وی عام لوکاں دی ورتوں لئی پیش کیتا گیا۔ نیب عدالت وچ جدوں شریف خاندان دے وکیل خواجا حارث نے مکالمہ کردے ہوئے دعوا کیتا کہ کیلبری فونٹ 2005وچ ای ہزاراں لوک ورت رہے سن تے ایس دوران آئی ٹی ایکسپرٹ رابرٹ ریڈلے نے مداخلت کردے ہوئے واضح کیتا کہ ایہ ٹھیک نہیں اے۔ کیلبری فونٹ 2007توں پہلاں عام لوکاں دی ورتوں وچ نہیں سی۔
