اسلام آباد(پاکستان پوائنٹ نیوز23۔فروری2018ء) مسلم لیگ (ن) دے قائد و سابق وزیر اعظم نواز شریف نے آکھیا اے کہ عدالت وچ اج کیلبری فونٹ اُتے ساڈے موقف دی تائید ہو گئی، رابرٹ نے آکھیا کہ کیلبری فونٹ 2005وچ دستیاب سی، جے آئی ٹی دی کارروائی دا جواب آنا شروع ہو گیا، جدوں کُجھ نہیں ملیا ضمنی ریفرنسز آ رہے نیں، (ن) لیگ نوں سینیٹ الیکشن لڑن توں وی روک دتا گیا۔
اوہناں نے اج احتساب عدالت دے باہر میڈیا نال گل بات کردے ہوئے آکھیا کہ ججاں نے گارڈ فادر، سیسلین مافیا، چور ڈاکو آکھیا ، اک پاسے ایہ آکھیا جاندا اے دوجے دن آکھیا جاندا اے کہ اسیں سیاسی رہنماواں دا بڑا احترام کردے آں۔ اوہناں نے آکھیا کہ ماضی وچ جسٹس منیر توں ہن تیکر جِنے وی سیاسی فیصلے آئے اوہناں نوں سنہری اکھراں وچ نہیں لکھیا جا سکدا۔
اوہناں نے سوال کیتا کہ ایہ سبھ کیہ اے؟ مینوں اقامے اُتے کڈھ دتا گیا جہنوں اج تیکر قوم نے منیا نہیں۔ ہن میرے خلاف تیجا فیصلا وی آئے گا جہدے وچ مینوں نااہل کیتا جائے گا۔ پہلے مینوں پارٹی سربراہی توں نااہل کیتا گیا۔ مسلم لیگ (ن) نوں سینیٹ الیکشن لڑن توں وی روک دتا گیا اے۔ اوہناں نے اک سوال اُتے آکھیا کہ کیلبری فونٹ دی تشریح توں اندازہ ہوگیا ہوئے گا کہ ساڈے موقف نوں تقویت ملی اے۔ رابرٹ نے آکھیا کہ ایہ فونٹ 2005وچ دستیاب سی۔ نواز شریف نے ہورآکھیا کہ جے آئی ٹی دی کارروائی دا جواب مل رہیا اے۔ جدوں کُجھ نہیں ملیا تے ہن ضمنی ریفرنسز آ رہے نیں۔ ہن ضمنی ریفرنسز وی فارغ ہو رہیا اے۔
