اسلام آباد(پاکستان پوائنٹ نیوز22۔فروری2018ء) بجلی چوراں خلاف وڈی پدھر اُتے کارروائی دا فیصلا کر لیا گیا۔ وفاقی وزیر اویس لغاری دا کہنا سی کہ سسٹم وچ ایس ویلے وادھو بجلی موجود اے، نقصان نہ ہون تے اسیں پورے ملک وچ زیرو لوڈ شیڈنگ کرن دی طاقت رکھدے آں۔ بجلی چوری روکن لئی وڈی پدھر اُتے کارروائی کرن دا فیصلا کر لیا گیا اے۔ تفصیل مطابق جمعرات نوں اپنے اک بیان وچ وفاقی وزیر نے آکھیا کہ اوہ ملک بھر دے بجلی ورتیندڑاں ساہمنے کُجھ زمینی حقائق رکھنا چاہندے نیں تاں جے آن والے دناں وچ خاص طور اُتے گرمی دے مہینیاں وچ بجلی دی صورتحال پوری طرحاں واضح ہوئے تے اوہناں نوں ایس گل دا چنگی طرحاں پتا ہوئے کہ حکومت اوہناں لئی کیہ کم کر رہی اے۔
اوہناں نے آکھیاکہ موجودہ حکومت نے دسمبر 2017توں ملک بھر وچ 10فیصد توں گھٹ نقصان والے فیڈرز اُتے لوڈشیڈنگ ختم کیتی ہوئی اے۔اوہناں دا کہنا سی کہ اسیں اپنی بجلی دیاں ونڈ کار کمپنیاں دے بورڈز، سی ای اوز تے عملے نوں نقصان گھٹ کرن لئی ٹارگٹ وی دتے۔ اوہناں دا ہور کہنا سی کہ بجلی دے کھلار وچ وادھے دی وجہ توں نقصان وچ 1-2%فیصد کمی مگروں سانوں تقریبن 360ارب سالہوار برداشت کرنے پین گے۔
جہدے لئی ملکی معیشت نہ تے اجازت دیندی اے تے نہ ای اسیں کسے چوری دا خمیازہ باقاعدگی نال بل ادا کرن والے ورتیندڑاں اُتے پا سکدے آں، سانوں ہر حال وچ ایس نقصان نوں گھٹ کرنا پئے گا۔ اوہناں نے آکھیا کہ ورتیندڑاں تے ساریاں صوبائی حکومتاں نوں آکھنا چاہنے آں کہ اوہناں دے تعاون دے بغیر نقصان نوں کسے وی طرحاں گھٹ نہیں کیتا جا سکدا۔ نقصان نوں گھٹ کرن لئی بجلی چوراں خلاف وڈی پدھر اُتے کارروائی کرن دا فیصلا کر لیا گیا اے۔
