اسلام آباد(پاکستان پوائنٹ نیوز07۔فروری2018ء) راؤ انوار نے اک ماں دے دو پُتراں نوں قتل کر کے لاشاں دین دے بدلے اک لکھ رُپئے منگے۔ متاثر ہ ماں آل پختون قومی جرگہ اسلام آباد دھرنے وچ اپڑ گئی۔ تفصیل مطابق سابق ایس ایس پی ملیر نے بُڈھی ماں دے دو پُتراں نوں قتل کر کے میتاں اک لکھ رُپئے لین مگروں دتیاں۔ بُڈھی سوانی انصاف لئی آل پختون قومی جرگہ دے اسلام آباد دھرنے وچ اپڑ گئی۔
مقامی اخبار نال گل بات کردے ہوئے لمبرو بی بی دا کہنا سی کہ اوہناں دے دو جوان پُتر حیدر علی تے شوکت علی نوں مبینہ طور اُتے راؤ انوار تے اوہدی ٹیم نے گرفتار کرکے قتل کر دتا ۔راؤ انوار نے آپ اوہدے پُتراں دیاں لاشاں دین لئی 50,50ہزار رُپئے لئے۔ دو ورھے لنگھن مگروں انصاف لئی مارے مارے پھرن والی لمبرو بی بی دا کہنا اے کہ اوہناں دے نِکے پُتر شوکت علی نوں 10جنوری 2018نوں گھروں گرفتار کیتا گیا جدکہ حیدر علی نوں 21مارچ 2015نوں گھروں ای گرفتار کیتا گیا پر دوواں خلاف کسے تھانے وچ مقدمہ درج نہیں کیتا گیا۔
والدہ مطابق جدوں شوکت علی نوں چُکیا گیا تے اوس ویلے راؤ انوار نال اوہدی ٹیم موجود سی۔ گرفتاری ویلے شوکت علی دی موٹر سائیکل تے مزدوراں دی 80ہزار رُپئے تنخاہ،شناختی کارڈ تے پاسپورٹ وغیرہ لِتے گئے تے دوویں پُتراں نوں وکھ وکھ جعلی مقابلیاں وچ قتل کیتا گیا۔ لمبرو بی بی نے چیف جسٹس توں آپ نوٹس لین دی اپیل کردے ہوئے مطالبہ کیتا اے کہ راؤ انوار نوں اوہدے کیتے دی سزا دتی جائے، تاں جے میری روح نوں سکون مل سکے۔
