ایبٹ آباد(پاکستان پوائنٹ نیوز07۔فروری2018ء) مشال خان قتل کیس وچ عدالت نے اک ملزم نوں سزائے موت سنادتی۔ تفصیل مطابق فیصلا انسداد دہشت گردی عدالت دے جج فضل سبحان نے ہری پور جیل وچ سنایا۔ عدالت نے مشال خان کیس وچ پھڑے گئے ملزماں وچوں اک ملزم نوں سزائے موت جدکہ 5ہور ملزماں نوں 25,25سال قید دی سزا دا حکم دتا اے۔ ہور 26ملزماں نوں بری کر دتا گیا۔ کیس دی 9مہینے چھ دن سنوائی ہوئی جدکہ 61وچوں 58گرفتار ملزماں نوں جج ساہمنے پیش کیتا گیا۔
ایس موقعے تے ہری پور جیل تے عبدالولی خان یونیورسٹی وچ سکیورٹی سخت سی۔ مشال خان دے والد لندن وچ نیں، ایس لئی اوہ مشال خان قتل کیس دی سنوائی وچ رلتی نہیں ہو سکے۔ چیتے رہوے کہ مشال خان قتل کیس دا فیصلا تن جنوری نوں محفوظ کیتا گیا سی۔ مشال خان عبدالولی خان یونیورسٹی وچ جرنلزم دا پڑھیار سی، جہنوں توہین رسالت دے الزام وچ لوکاں دے اک جتھے نے پچھلے ورھے بے دردی نال قتل کر دتا سی۔
