لاہور(پاکستان پوائنٹ نیوز06۔فروری2018ء) نواز شریف نے پارٹی قیادت دیاں ذمے واریاں مریم نواز دے حوالے کرن دا فیصلا کر لیا اے۔ تفصیل مطابق مشہور پرچاکار و تجزیہ نگار ڈاکٹر شاہد مسعود ولوں نجی ٹی وی چینل دے پروگرام وچ گل بات کردے ہوئے دعوا کیتا گیا اے کہ نواز شریف مگروں پارٹی قیادت ہن مریم نواز سنبھالن گیاں۔ ڈاکٹر شاہد مسعود داکہنا اے کہ پچھلے دیہاڑے آزاد کشمیر وچ جلسے دوران نواز شریف نے مریم نواز نوں ہور رہنماواں توں پہلاں خطاب کرن دی ہدایت کر کے واضح پیغام دے دتا اے۔
ایہ پیغام شہباز شریف تے ہور لئی اے۔ ڈاکٹر شاہد مسعود دا کہنا ا ے کہ نواز شریف مگروں پارٹی دی قیادت تے وزارت عظمی دیاں ذمے واریاں شہباز شریف یاں کسے ہور رہنما نوں نہیں ملن گیاں۔ کل دے جلسے مگروں ہن واضح ہو گیا اے کہ پارٹی قیادت تے وزارت عظمی دیاں ذمے واریاں مریم نواز دے حوالے کیتیاں جان گیاں۔ چیتے رہوے کہ کُجھ مہینے پہلاں نواز شریف نے شہباز شریف نوں آؤندے وزیر اعظم دے طور اُتے میدان وچ لیان دا اعلان کیتا سی۔ پر بعدوں وزیر اعظم شاہد خاقان عباسی نے کئی موقعیاں اُتے ایس فیصلے خلاف بیان دتے تے آکھیا کہ ایہ فیصلا آخیری نہیں اے۔
