قصور(پاکستان پوائنٹ نیوز16۔جنوری2018ء) قصور وچ زیادتی مگروں قتل ہون والی 7ورھیاں دی زینب دے والد محمد امین نے اُردو پوائنٹ نال اُچیچی گل بات کردے ہوئے آکھیا کہ حکومتی جماعت دے دعوے نیں کہ ساڈے نال تعاون کیتا جا رہیا اے پر حقیقت تے ایہ اے کہ ہن تیکر مجرم نوں ای نہیں گرفتار کیتا جا سکیا۔ اوہناں دا کہنا سی کہ اک بندہ ٹریس ہو گیا اے پر اجے تیکر اوہدی شناختی نہیں کیتی جا سکی۔
زینب کیس وچ رشتے داراں دے ملوث ہون دی گل نوں رد کردے ہوئے زینب دے والد نے آکھیا کہ اسیں سبھ توں پہلاں اپنے رشتے داراں دے ڈی این اے کروائے نیں پر کوئی ڈی این اے میچ نہیں ہویا۔ ایس توں صاف ظاہر اے کہ ساڈا کوئی رشتے دار ایہدے وچ ملوث نہیں۔ محمد امین نے آکھیا کہ سی سی ٹی فوٹیج وچ ویکھیا گیا کہ اوہ مُنڈا زینب نوں لیجا رہیا اے، جے اسیں اوہنوں پچھان لیندے تے فیر اسیں اوہنوں پھڑ لینا سی۔
اوہناں دا کہنا سی کہ بالڑی دے اغوا مگروں ملزم دی سی سی ٹی وی فوٹیج ساہمنے آ گئی سی۔ اوہ ویلا سی جدوں ملزم پھڑیا جا سکدا سی پر پولیس نے ساڈے نال کوئی تعاون نہیں کیتا۔ اوہناں دا کہنا سی کہ ملزم ساڈے علاقے دا نہیں اے بلکہ کیتوں باہروں آیا اے، ایس لئی اوہدی شناخت نہیں ہو رہی۔ اپنی گل بات وچ اوہناں نے زینب کیس بارے آواز چُکن اُتے عوامی تحریک دے سربراہ ڈاکٹر طاہر القادری دا شکریہ وی ادا کیتا۔
