لاہور(پاکستان پوائنٹ نیوز13۔جنوری2018ء) مینوں سبھ توں چنگا کم پنجاب وچ ہوندا نظر آ رہیا اے۔تفصیل مطابق اک تقریب نال خطاب کردے ہوئے چیف جسٹس میاں ثاقب نثار داکہنا سی کہ انصاف وچ دیر بہت وڈا مسئلا اے تے اسیں ایس مسئلے نوں حل کرنااے۔ اوہناں داکہناسی کہ لوکاں نوں ایس گل دی شکایت اے کہ اوہناں نوں چھیتی انصاف نہیں ملدا پر لوکاں نوں ملک اندر سستا انصاف ملنا چاہیدا۔
عدالت وچ جان دے خوف توں لوک اپنامسئلاآپے حل کرن دی کوشش کردے نیں۔ اوہناں نے آکھیا کہ بعض کیس کئی کئی سال چلدے نیں،فیر کیتے جا کے سپریم کورٹ آؤندے نیں تے پتا چلدا اے کہ ملزم بے گناہ اے۔ آخیر ایس نظام نوں ٹھیک کہنے کرنا اے؟اوہناں نے آکھیا کہ اسیں اپنیاں جوڈیشل اکیڈمیاں نوں ایڈیٹ کرنا اے۔ اوہناں دا کہنا سی کہ جہنے قانون وچ بدلی کرنی اے اوہ ایہدے اُتے توجہ دیوے۔
چیف جسٹس دا کہنا سی کہ عدالتاں اپنیاں حداں وچ رہندیاں نیں۔ ماتحت عدالتاں وچ فیصلا ویلے سِر ہویا تے اعلا عدالتاں اُتے بھار گھٹ ہوئے گا۔ اوہناں نے آکھیا کہ اسیں قانون سازی نہیں کرسکدے۔ چیف جسٹس ثاقب نثار داکہنا سی کہ پنجاب وچ ماڈل کورٹس بنائیاں گئیاں تے جدید نظام لیاندا گیا اے۔ مینوں سبھ توں چنگا کم پنجاب وچ ہوندا نظر آیااے۔ پورے پاکستان وچ صرف پنجاب وچ فرانزک لیبارٹری اے۔ اوہناں نے آکھیا کہ پنجاب توں وکھ کیتے وی معیاری فرانزک لیب نہیں اے۔
