قصور(پاکستان پوائنٹ نیوز13۔جنوری2018ء) نِکی بالڑی دی پرنسپل دا کہنا اے کہ زینب اپنی عمر توں ودھ سمجھدار سی۔ اوہ ایس طرحاں کسے دا ہتھ پھر کے کسے نال نہیں جا سکدی سی۔ ٹی وی اینکر دے سوال دے جواب وچ زینب دی والدہ دا کہنا سی کہ اوہ اک مہینے توں زینب نوں سمجھا رہیاں سن کہ کسے اجنبی نال نہیں جانا، نہیں تے اوہ پھڑ کے لے جاند ے نیں۔ جہدے اُتے زینب نے میری ول ویکھیا تے سوال کیتا کہ اوہ فیر کیہ کردے نیں؟ میں اوہنوں دسیا کہ اوہ فیر مار دیندے نیں۔
اوہناں دا کہنا سی کہ زینب بہت سمجھدار سی اوہ کسے اجنبی نال نہیں جا سکدی سی، مینوں ایس گل دا پکا یقین اے کہ اوس بندے نے زینب نوں آکھیا ہوئے گا کہ تہادی امی آ رہی اے ایس لئی اوہ کسے اجنبی نال چلی گئی ہوئے گی۔ زینب دی ماں دا کہنا سی کہ میری زینب نال فون اُتے گل ہوئی سی۔ اوہ بہت خش تے مطمئن سی۔ اوہنے فون اُتے آکھیا سی کہ میرے لئی کھڈونے لے کے آنا۔
